KRALENDIJK – Na Aeropuerto Internashonal Flamingo (BIA), e sistema pa transportá maleta na bali di chèk-in bai patras a wòrdu drechá pa esaki por fungi mihó.
E trabou aki a wòrdu realisá huntu ku ACB Transportbanden & Onderdelen. Pa minimalisá e impakto riba biahero, e trabou a wòrdu ehekutá pafó di e ora normal di chèk-in. Di e forma aki por a perkurá ku e operashon di aeropuerto a sigui normal. Durante e siman binidero, e ekipo tékniko di BIA lo bai hasi algun trabou adishonal, manera kambio di e wilnan ku ta laga e maletanan kore.
Segun BIA a bisa, e sistema nobo no ta solamente hasi e proseso di chèk-in mas konfiabel, pero tambe mas rápido. E sistemanan nobo ta permití ku e bantnan di maleta komuniká mihó ku otro, loke ta permití ku maleta yega na e skèner di forma mas efisiente.
Mas efisiensia
BIA a enfatisá tambe ku e mehorashonnan ta benefisiá tantu pasahero, empleado komo partnernan di aviashon. “Nos ta sigui invertí den infrastruktura konfiabel pa mehorá kontinuamente e efisiensia i servisio na Aeropuerto Flamingo,” segun un deklarashon di aeropuerto.