KRALENDIJK - Durante dos periodo domi Jonkman tabata embolbí na e kongregashon di Boneiru: di 1964 te 1971 i di 2002 te 2006. Despues el a sigui mantené tambe un laso spesial ku e isla. Dia 18 di yanüari por ehèmpel di e aña aki el a dirigí un sirbishi, kaminda a kanta entre otro e kantika “Mi ta mira un porta hanchu habrí”, palabranan ku segun e kongregashon ta haña un nifikashon èkstra ku su fayesimentu.
Durante su añanan na Boneiru domi Jonkman a komprometé su mes ku hopi dedikashon pa lantamentu di e komunidat protestant segun e mes a bisa. Miembronan di kongregashon ta rekòrd’é komo un persona ku no solamente tabata prediká su fe, pero tabata bib’é tambe: den stimashon, humildat i embolbimentu pa bienestar di otro.
Kongregashon Protestant Uní di Boneiru ta papia di un “herensia balioso di fe, fieldat i sirbishi” i ta deseá famia- i konosínan di domi Jonkman forsa ku e pèrdida.