KRALENDIJK – Mester reanudá e kompetensianan di futbòl atrobe na Boneiru i na mes momento mester fortifiká e struktura atministrativo di Federashon di Futbòl Boneriano (FFB). Pa sostené e proseso ei un delegashon di CONCACAF tabatin un bishita di trabou na Boneiru. A traha un plan di akshon riba término korto ku finalmente mester kondusí tambe na elekshonnan nobo pa e federashon di futbòl pa mas tardá febrüari 2027.
E delegashon tabata konsistí di Howard McIntosh i Sofia Malizia di e departamentu Member Associations di CONCACAF. Durante e bishita nan a papia ku diferente persona embolbí di mundo di futbòl Boneriano i ku representante di e klupnan. Segun e federashon esnan presente por a duna nan vishon abiertamente riba e problemanan ku futbòl tin aktualmente riba e isla.
Un tópiko importante tabata e pregunta kiko mester pa reanudá futbòl organisá na Boneiru atrobe na un manera responsabel, duradero i bon organisá. Segun e presidente di FFB nan a eksperensiá e kombersashonnan komo produktivo i konstruktivo. Representantenan di CONCACAF lo tabata satisfecho ku nan por a papia direktamente ku hendenan di mundu di futbòl Boneriano i por a tende nan preukupashonnan.
Plan di akshon pa reanudá futbòl
Despues di e kòmbersashonnan a traha un plan di akshon riba término korto. Eiden tin medidanan konkreto pa realisá aktividatnan di futbòl. Tambe ta deskribí pasonan ku mester pa fortifiká tantu e struktura organisatorio komo e direktiva di FFB.
Parti di e trayekto ei ta pa restablesé un stuktura atministrativo stabil. Intenshon ta ku pa mas tardá febrüari 2027 lo tene elekshonnan nobo pa e federashon di futbòl. FFB ta enfatisá ku pa esei koperashon, esfuerso i konfiansa di tur partido embolbí ta nesesario dentro di futbòl Boneriano.
E federashon ta bisa ku e tin masha apresio pa e guia di CONCACAF i ta hasi un yamada riba e klupnan i sobrá di e komunidat di futbòl pa koperá konstruktivamente ku ehekushon di e plan di akshon.
“E kòmbersashonnan tabata konstruktivo i a pèrmiti nos pa indiká kua paso mester tuma kla i práktiko pa sigui ku e stapnan e presidente di FFB ta laga sa. Segun e presidente e plan di akshon ta brinda un kuadro konkreto pa reanudá e aktividatnan di futbòl, fortifiká e direktiva i e struktura institushonal di e federashon i traha riba elekshonnan nobo.
FFB ta bisa di duna mas informashon tokante ehekushon di e plan di akshon, e reanudashon real di futbòl i e trayekto ku ta sigui rondó di fortifikashon di e direktiva di e federashon.