KRALENDIJK – Frakshon di M21 den Konseho Insular a hasi pregunta por eskrito na gezaghèber John Soliano tokante señalnan di posibel interferensia polítiko den aparato amtenal di Entidat Públiko Boneiru. E frakshon ke sa si e señalnan aki ta duna motibu pa realisá un investigashon tokante integridat den aparato públiko di e isla.
E motibu pa e preguntanan ta un karta di gezaghèber di dia 10 di ougùstùs na Konseho Insular. Den e karta ei, segun M21, Soliano a menshoná ku señalnan di posibel inherensia polítiko den e aparato gubernamental a yega na su oido. Gezaghèber a suprayá ku metementu polítiko den e maneho diario òf e aparato gubernamental por afektá e kalidat di e gobernashon.
M21 ta referí ademas na e modelo dualístiko di gobernashon, kaminda Konseho Insular ta establesé e maneho i ta kontrolá Kolegio Ehekutivo, mientras ku e maneho diario ta kai bou responsabilidat di e Kolegio Ehekutivo.
Segun M21, ámtenarnan mester por ehersé nan trabou di forma independiente, ophetivo i basá riba lei. E frakshon ta pone ku presion polítiko riba ámtenarnan por dañá e integridat gubernamental.
Den e karta di 20 di ougùstùs, M21 ta puntra e gezaghèber entre otro si e tin konosimento di e señalnan en kuestion i si esaki ta duna motibu pa ordená un investigashon di integridat. E frakshon ke sa tambe si pasonan ofisial a wòrdu tumá en kaso ku tabatin intimidashon òf otro akusashonnan.
M21 ta pidi e gezaghèber pa reakshoná riba e preguntanan lo mas pronto posibel.