KRALENDIJK - Djaluna 17 di ougùstùs 2026, Kuerpo Polisial Hulanda Karibense (KPCN) a rekordá fayesimentu di kolega, amigu i agente polisial, Ferry Bakx. Eksaktamente dies aña pasá, Ferry a pèrdè su bida durante ehekushon di su funshon. Durante un seremonia di konmemorashon na warda di polis, hefe di kuerpo suplente Rob Meijer a rekordá presentenan riba e impakto di e pèrdidá aki. Komo homenahe a desvelá un plakat nobo di konmemorashon, a tene un minüt di silensio i koleganan por a pone un rosa na su memoria.
Riba 17 di ougùstùs 2016, Ferry Bakx a rekshoná riba un ‘melding’ durante su warda, dediká na yuda otronan i pa mantené Boneiru seif. E anochi ei e no a bolbe kas mas.
“Awe nos no ta rekordá solamente kiko a sosodé e anochi ei. Nos ta kòrda Ferry spesialmente komo kolega i komo ser humano. Un persona ku koleganan a traha huntu kuné, a hari, a traha warda i a kompartí eksperensia. Awe nos pensamentunan ta tambe ku su famia i su sernan kerí. Pa nan, 17 di ougùstùs no ta simplemente un fecha den historia di nos kuerpo. E pèrdidá di Ferry pa semper ta keda un parti di nan bida”, segun Rob Meijer.
Durante e enkuentro a desvelá un plakat nobo di konmemorashon na warda di polis. A kologá e plakat aki na un lugá sentral kaminda koleganan ta pasa diariamente, pa asina e rekuerdo di Ferry keda bibu.
Ounke dies aña a pasa i hopi kolega nobo no a konosé Ferry personalmente, maneho di kuerpo a enfatisá ku su nòmber lo keda pa semper parti di e historia di e kuerpo.