DÜSSELDORF / WILLEMSTAD - Kompania di biahe Corendon lo kuminsá ofresé buelonan direkto for di aeropuerto di Düsseldorf pa Kòrsou durante e próksimo temporada di invierno, segun informashon publiká den medionan hulandes.
E ruta nobo ku probbilidat lo kuminsá dia 14 di desèmber ku tres buelo pa siman, operá pa World2Fly ku un avión Airbus A330.
Corendon ta bula entre Schiphol na Hulanda i Kòrsou den kombinashon ku Boneiru, pero awor e kompania ta pone mas enfoke riba salida for di Alemania, ya ku impuesto pa bula for di Hulanda lo subi konsiderablemente e aña ku ta bin aki, mientras ku e impuesto pa buelonan largu for di Alemania lo baha.
E aeropuerto di Düsseldorf, situá serka frontera hulandes, ta popular bou di biahero hulandes pa motibu di preis di pasashi mas abou i gastunan pa stashoná outo hopi mas barara ku ta e kaso na Hulando.
E desaroyo tambe ta nifiká e regreso di buelonan direkto entre Düsseldorf i Kòrsou pa promé biaha desde ku Air Berlin a para ku e ruta na 2017 despues ku e kompania aki a bati bankrut. No ta konosí ainda ku sierto di e buelonan aki lo bai wòrdu kombiná ku Boneiru, òf ku ta trata estriktamente di buelonan ku destinashon Kòrsou. Aktualmente Corendon tin dos buelo pa siman ku ta yega Aeropuerto Flamingo tambe, den kombinashon ku Kòrsou.