KRALENDIJK – Un tim hubenil di klup di futbòl Flamingo a tene un akshon di limpiesa grandi den Kaya Avelino J. Cecilia e fin di siman ku a pasa. E akshon tabata forma parti di e proyekto Disiplina ta gana mas, kaminda timnan di deporte ta komprometé nan mes pa traha pa komunidat i tin chèns di gana un premio di 3.000 dòler.
E hungadónan Jamie Blanken i Zilan Aziz tabata piki sushi for di mondinan kantu di kaminda huntu ku nan kompañeronan. Segun e hóbennan tin hopi sushedat den e serkania. Nan a topa spesialmente glas durante e akshon. “Si, tin hopi sushedat akinan,” un di e hungadónan a bisa.
E tim ta partisipá saliendo for di un kombinashon di deportivismo i kompromiso sosial. “Nos ta hasié mas tantu pa e bon kousa. Yuda Boneiru,” segun un hungadó di Flamingo.
E akshon di limpiesa ta parti di un kompetensia kaminda e timnan por gana punto hasiendo aktividatnan sosial. Segun e hungadónan e tim mester demostrá tambe loke a hasi. “Nos mester saka pòtrèt pa mustra ku bo a limpia,” Blanken ta splika
Ku e premio di sèn e tim lo ke hasi algu leuk ku e grupo. Riba e pregunta kiko nan ke hasi ku e 3.000 dòler, Aziz a laga sa: “Nos ta pensa riba un aktividat leuk ku tim, manera paintball.”
Remarkabel ta ku Kaya Avelino J. Cecilia ta mustra limpi despues di e akshon, mientras ku no ta dura masha ku tin sushi atrobe den mondi. Apénas tin klikonan públiko presente den serkania.
A aserká Selibon ku pregunta di e kòntrakt di kuido i falta di klikonan públiko na sierto lugánan públiko. E kompania di prosesá sushi sa limpia tambe mondinan kantu di kaminda. Selibon a laga sa di no ta para habrí pa un reakshon i no ke kompartí e kòntrakt di kuido. A hasi petishon algun siman pasá pa e kòntrakt aki serka Entidat Públiko di Boneiru via un petishon WOB.