KRALENDIJK – Den anochi di djaluna pa djamars a destruí konsientemente sinku nèt di tènis di bich na e kanchanan deportivo Rudy Boezem. A kòrta tur e nètnan na mesun manera: nèt meimei i di abou bai ariba. Remarkabel ta ku e nètnan na e banda ku ta habrí tin heru, di manera ku un skèr òf kuchú normal no tabata sufisiente pa hasi e daño.
Segun esnan konserní ta trata opviamente di vandalismo intenshonal. E destrukshon no ta okashoná solamente frustrashon, pero tambe daño finansiero konsiderabel.
Direktor di Indebon Terrence de Jongh a bisa ku e ta hopi desepshoná. “No ta promé biaha. Últimamente tin hopi vandalismo riba kanchanan di deporte nai Boneiru. Danki Dios nos tabatin seis nèt ainda den stòk pa e problema aki. Pero e vandalismo aki ta kosta nos kada biaha hopi sèn,” segun De Jongh.
(Potrèt: Hans Hofstra )
Uso di kámara ta fastioso
Na mes momento e ta enfatisá ku no por regla vigilansia èkstra fásil. “Konseho insular òf gezaghebber mester disidí pa pone kámara na lugánan públiko,” e ta deklará.
E organisashon di tènis di bich a aunsiá despues ku por lo pronto Indebon ta tuma medidanan èkstra pa prevení destrukshonnan nobo. Den futuro ta kita e nètnan di tènis di bich tur anochi 10’or i ta kologá nan bèk e siguiente mainta 7’or. Segun e organisashon ta trata di un medida temporal.
Anteriormente e organisashon a hasi un yamada kaba na personanan ku mira òf tende algu sospechoso pa mèldu esaki. Ta spera ku testigunan òf eventual imáhennan di kámara por yuda pa deskubrí esnan kulpabel.