KRALENDIJK – E organisashon di Bonaire Sailing Regatta a aunsiá e fechanan ofisial pa e di 59 edishon di e evento akuátiko mas grandi di Boneiru. Regata ta tuma lugá di djadumingu 11 di òktober te ku djadumingu 18 di òktober 2026 den besindario di Malekon i haf di Kralendijk.
Durante e konferensia di prensa na Restorant El Mundo a elaborá riba e edishon ku ta na kaminda. E organisashon a enfatisá ku konsientemente ta kuminsá hopi tempran ku e preparashonnan. Ku esaki nan ta spera di no solamente atraé partisipantenan internashonal, pero tambe pa duna kompanianan di aviashon sufisiente tempu pa planiá buelonan èkstra pa Boneiru.
Aksesibilidat
E aksesibilidat di Boneiru durante siman di Regata ta keda un punto importante di atenshon. Añanan anterior buelonan di entre otro Kòrsou i Aruba tabata simannan delantá yen kaba, di manera ku bishitantenan tabatin problema pa buk un pasashi ainda pa partisipá na e evento.
Pa añanan kaba Bonaire Sailing Regatta ta konosí komo un kombinashon di kompetensia di bela, kultura i entretenimentu. Banda di kompetensianan riba laman e evento ta brinda tambe tokánan bibu, aktividatnan riba malekon i nochinan festivo den Kralendijk.
Ekilibrio entre tradishon i espektákulo
Sinembargo pa basta tempu kaba tin krítika for di mundu di bela ku e karákter deportivo di regata a bira ménos visibel pa motibu di e enfoke kresiente riba músika i dibertishon. Ta pesei segun un artíkulo anterior di Bonaire.nu e organisadónan ta buska un mihó ekilibrio entre tradishon i espektákulo.
Durante e konferensia di prensa e organisashon a enfatisá sinembargo ku ámbos parti no ta interferí ku otro. E kompetensianan di bela ta tuma lugá durante dia, mientras e konsierto- i festividatnan ta kuminsá mas lat anochi.
Tambe a anunsiá ku entrega di premio en lo futuro lo tuma lugá riba djabièrnè anochi. Asina ta krea mas espasio riba djasabra pa aktividatnan adishonal, manera fiestanan di boto i dibertishon riba malekon.
Ku e anunsio tempran e organisashon no ke logra solamente un di 59 edishon eksitoso, pero tambe kuminsá traha ya kaba riba e edishon di hubileo di Bonaire Sailing Regatta na 2027.