KRALENDIJK – For di 11 pa 14 di ougùstùs 2026, Tourism Corporation Bonaire (TCB), huntu ku Sorobon Luxury Beach Resort, a kondusí un mishon di benta na Toronto. E mishon a tuma lugá na kaminda pa reanudashon di e buelonan direkto di WestJet entre Toronto i Boneiru pa e temporada di wenter 2026-2027.
Canada a bira un di e sinku merkadonan di mas importante pa turismo di estadia na Boneiru. E kantidat di yegada a oumentá di 3437 na aña 2023 pa 5248 na aña 2025, un kresementu di mas òf ménos 53%. “Nos enfoke no ta solamente riba yenamentu di e buelonan e wenter akí, pero tambe riba edifikashon di un demanda permanente i kreamentu di e kondishonnan nesesario pa mantené e ruta akí”, segun Elesiër Angel, direktor di TCB.
Algun di a partnernan di Boneiru durante e evento.
(Pòtret: TCB)
Durante e mishon e delegashon a bishitá e Canadian Meetings and Events Expo (CMEE), a hiba kòmbersashon ku WestJet i Sunwing, i a organisá un sena estilo ‘live-cooking’ inspirá pa Boneiru bou di guia di shèfkòk Giovannie Veld. Pa mas di 25 konsehero di biahe i agentnan, premionan — inkluso un buelo ida i buelta via WestJet i estadianan na Sorobon Bay Hotel i Delfins Beach Resort — a wordu rifá.
E evento di live cooking
(Pòtret: TCB)
TCB ke gradisí spesialmente Sorobon Luxury Beach Resort, Arena Destination Marketing, WestJet, Delfins Beach Resort i shèfkòk Giovannie Veld pa nan kontribushon na éksito di e mishon akí.