KRALENDIJK - Durante dos siman, un grupo di hobenan di enseñansa sekundario a pone nan atenshon riba siña e idioma Hulandes durante e Summerschool, organisá pa Stichting Lezen en Schrijven. E partisipanten ta prinsipalmente hóbennan nobo ku a bini na Boneiru, hopi di nan di Latino-Amérika i Haití.
E Summerschool a kombina les intensivo di idioma ku un programa di aktividatnan variá i atraktivo. Den mainta e hóbennan a risibí les di profeshonalnan, ku hopi atenshon pa siña i usa e idioma Hulandes. Tambe durante e aktividatnan di atardi, Hulandes tabata e idioma prinsipal. Asina e hóbennan por a praktisá e idioma di un manera natural i práktiko.
E Summerschool ta wordu organisá kaba pa varios aña i den añanan anterior a por wordu realisá, entre otro, na sosten di Cargill. E aña aki Rotary a yuda hasi e Summerschool posibel, dunando hóbennan nobonan e oportunidat pa haña sosten i desaroyo den nan proseso pa siña Hulandes.
Un parti spesial di e Summerschool tabata e klousura. E partisipanten a risibí un sertifikado i pa esaki nan mester a duna un presentashon na Hulandes. Un reto bunita, pero prinsipalmente un momento pa mustra loke nan a siña durante e dos siman.
Durante e klousura, e Gezaghebber di Boneiru tambe tabata presente. El a papia ku e hóbennan i a enfatisá den su diskurso bunita i interesá e importansia di edukashon, desaroyo i oportunidatnan pa tur hende. Su presensia i interes a wordu hopi apresiá tantu pa e organisashon komo pa e partisipantenan.
E Summerschool ta mustra kon importante ta pa hóbennan nobo na Boneiru haña desde e inisio e oportunidat pa siña Hulandes i pa partisipá aktivamente den komunidat. Dos siman di siña intensivo, praktika i traha huntu no solamente ta trese mas abilidat den idioma, pero tambe enkontro bunita, eksperensianan nobo i mas konfiansa den nan mes.
Stichting Lezen en Schrijven ta mira bek ku hopi apresiashon riba e Summerschool i ta gradisí tur e dosentenan, Rotary, Cargill i tur otro persona i organisashon envolví ku a hasi e Summerschool posibel durante e añanan.