KRALENDIJK – Tourism Corporation Bonaire (TCB) ke atraé mas turista for di Brazil pa Boneiru. Pa logra esaki, e organisashon turístiko a firma un akuerdo di kolaborashon pa un período di prueba di tres luna ku Linking Brothers, un empresa ku ta enfoká riba merkado turístiko di Brazil.
Segun TCB, Brazil ta ofresé oportunidat interesante pa kresementu. Durante e promé ocho lunanan di 2026, 1.049 turista for di Brazil a bishitá Boneiru, un oumento di 44 porshento kompará ku e mesun período aña pasá. Mas o ménos un tersio di e bishitantenan a bini prinsipalmente pa buseo, miéntras ku seis di kada dies a bishitá Boneiru pa promé biaha.
Remarkabel ta ku e kresementu aki ta tuma lugá apesar ku no tin un konekshon di buelo direkto entre Brazil i Boneiru. Ademas, turistanan di Brazil ta biaha relativamente hopi durante luna di mei i yüli, dos luna ku normalmente ta mas trankil riba e isla.
E kolaborashon lo kuminsá ku un webinar pa organisadónan di biahe na Brazil, siguí pa kampañanan di promoshon dirigí i kontaktonan ku empresanan lokal ku ta ofresé aktividatnan di buseo, ekoturismo i akomodashonnan di eskala chikí.
Pòtret: TCB Ku e inisiativa aki, TCB ke diversifiká e merkadonan turístiko i redusí e dependensia di Boneiru di e paisnan di orígen tradishonal di bishitantenan. Despues di e período di prueba, lo evaluá e resultadonan pa determiná si e kolaborashon lo kontinuá.