KRALENDIJK – PVV ke pa pone Boneiru bou di kuratela i ku ta traspasá outoridat di e isla pa Den Haag. Esei a bini dilanti durante e debate tokante presupuesto di Relashonnan di Reino den Tweede Kamer. Miembro di Kamer pa PVV Vlottes ta bisa ku Hulanda mester intervení mas fuerte den e problemanan gubernamental na Boneiru.
“Dikon no gewon tur outoridat pa Reino?”, Vlottes ta puntra su mes. Segun PVV Hulanda mester tuma mas responsabilidat pa e situashon riba e isla.
Van der Burg ke papia ku gobièrnu
Sekretario di Estado Van der Burg ta enfatisá ku Boneiru ta un parti igual di Hulanda, ku un propio konseho insular ku a skohe demokrátikamente i un propio konseho ehekutivo. P’esei Reino no por tuma e outoridat gewon asina over.
“Mi aporte pues no ta pa tuma e gobièrnu over, pero pa papia ku e gobièrnu, sostené kaminda mester i kaminda lei ta duna espasio pa esei aktua kaminda esei ta nesesario”, Van der Burg ta skirbi den su kontesta na preguntanan di Kamer.
E sekretario di estado ta hasi otro siman un bishita di trabou na Boneiru. Einan e ke traha palabrashonnan ku Kolegio Ehekutivo pa e siguiente stapnan konkreto, faktibel i realisabel pa mehorá e situashon gubernamental.