KRALENDIJK – Akohidanan di mucha na Boneiru ta wardando e siman aki mas largu ku a spera riba kompensashon di Servisio di Reino Karibe Hulandes (RCN) pa akohida di mucha. A drenta notifikashonnan di e sektor ku no a risibí pago ainda. Tambe a yega na orea di redakshon señalnan ku empleadonan di e organisashonnan di akohida di mucha lo no a risibí nan salario ainda. Segun RCN sinembargo e dos kasonan ei ta lòs for di otro.
Un bosero di RCN ta konfirmá ku e promé organisashonnan di akohida di mucha a risibí nan pago djaweps. E datonan di pago di e sobra organisashonnan ta sigui djabièrnè. Nan por spera e sèn djabièrnè mèrdia òf djaluna riba nan kuenta segun RCN.
“Ta purba semper pa transferí sènnan pa e kuartal nobo e promé dos simannan di e kuartal konserní”, un bosero ta duna di konosé.
E kompensashon ku ta transferí awor, ta relashoná ku e di kuater kuartal di 2026, pues di lunanan òktober, novèmber i dezèmber. P’esei segun RCN e pago atrasá no por ta kousa di eventual problema ku salario di empleadonan. “Segun mi ta paga e salarionan pa kuartal 4 pa promé biaha fin di òktober numa”, segun e bosero.
Akohida di mucha ta warda riba pago
Un organisashon di akohida di mucha ta konfirmá ku e pago di RCN a drenta mas lat ku a spera. Segun e organisashon a indiká anteriormente ku e sèn lo ta riba kuenta na prinsipio di e kuartal.
“E mester ta riba bo kuenta e promé dia di luna, òf e promé dia di e kuartal”, e representante di e akohida ta bisa. Un pago anterior e sèn a drenta riba dia 6 di e luna.
Salarionan ta lòs di e pago nobo
Mientrastantu e retraso ta pèrkurá pa konfushon tokante salario di e empleadonan. Un empleado a informá redakshon ku lo no a paga personal di organisashonnan di akohida di mucha ainda i ku esei segun e persona enkargá ku guia ta relashoná ku e kompensashon mensual ku no a paga ainda.
Segun RCN esei sinembargo no ta kuadra. E kompensashon ku ta paga awor ta pa e di kuater kuartal. E organisashon pa akohida di mucha ku redakshon a papia kuné, ta splika ku ta risibí e sèn delantá i seguidamente ta us’é durante e kuartal pa paga entre otro gastunan di personal i otro gastu.
“No ta asina ku no por paga e empleadonan ei pasobra e sèn no t’ei ainda”, e representante ta bisa. Segun e representante e responsabilidat pa paga e personal na tempu ta serka e doño di e akohida. “Ta problema di e doñonan. No ta problema di RCN.”
E organisashon di akohida di mucha mes ta bisa di ta paga su empleadonan normal. “Naturalmente ami mester hasi esei. E personal no tin nada ke ber ku e problema aki”, segun e representante.
Falta di komunikashon
Fuera di e retraso mes spesialmente komunikashon ta un punto di krítika. E organisashon di akohida di mucha ta bisa ku no a informá e akohidanan konhuntamente di e motibu di e retraso òf ki ora nan por fèrwagt e sèn.
“Nan no ta komuniká manera debe ser”, e representante ta bisa. Segun e ta informá organisashonnan separadamente ora nan mes puntra.
RCN ta bisa ku mientrastantu a paga un parti di e organisashonnan i ku lo prosesá e sobrá pagonan djabièrnè. Ku esaki pa kuminsamentu di otro siman e retraso mester ta eliminá.