KRALENDIJK - Gang di Arte Bonaire ta organisá for di 29 te ku 31 di mei un `bootcamp` di introdukshon pa hóbennan entre 12 i 18 aña ku interes den ritmo, perkushon i presentashon. E aktividat di tres dia ta marka inisio di un grupo nobo di perkushon pa hóbennan na Boneiru. Durante e `bootcamp`, partisipantenan lo konosé diferente instrumento, traha huntu riba presentashon i esenario. Tur esaki bou di guia di perkushonista Sandy Hato. Partisipashon ta grátis.
Gang di Arte Bonaire ta un inisiativa di Art Culture Education Foundation (ACE) i ta konta ku sosten di KAIM i OLB/SKAL. E proyekto ta bou di koordinashon di Damari Alonso i a wordu kreá ku e meta pa den un ambiente positivo i kreativo trese talentonan lokal huntu. Tambe e inisiativa ta enfoká riba desaroyo di talento i fortalesementu di partisipashon kultural entre hóbennan.
Despues di e `bootcamp` , lo kuminsá un programa di ensayo i presentashonnan durante evento kultural. Hóbennan ku ke partisipá por registrá nan mes via acesbonaire@gmail.com , via WhatsApp: +599 790 0155 òf riba e lenk di registrashon . Mas informashon tokante aktividatnan futuro lo wordu kompartí pa medio di e kanalnan di komunikashon di Gang di Arte Bonaire i ACE Foundation.