KRALENDIJK – Wardakosta di Área di Karibe a interseptá aña pasá mas ku 11.000 kilo di droga. Ta trata di 5.783 kilo di kokaina i 5.450 kilo di mariwana. Na mes momento e kantidat di droga interseptá a baha atrobe kompará ku e nivel máksimo alkansá di añanan anterior. Segun Wardakosta esei ta debí tambe pasobra e barku di patruya di Defensa tabata ménos disponibel pa operashonnan internashonal di droga pa motibu di tenshonnan rondó di Venezuela.
Esei ta sali na kla for di e Relato di aña di 2025 di Wardakosta pa Reino Hulandes den área di Karibe. Banda di e hayasgonan di droga Wardakosta a topa tambe 69 persona indokumentá. Tambe a reskatá 443 persona durante 258 yamada di búskeda i reskate. Banda di esei Wardakosta a registrá 14 víktima mortal i 38 persona pèrdí riba laman dentro di e área responsabel.
Zona dinámiko
E organisashon ta papia di un “zona dinámiko i desafiante” kaminda spesialmente e situashon geopolítiko rondó di Venezuela a haña mas influensia riba e esfuerso di persona- i rekursonan. Desde ougùstùs a hasi uso pa gran parti di e barku di patruya di Defensa di Área di Karibe pa kontrolá situashon di seguridat rondó di islanan ABC. Pa e motibu ei e barku a sali ménos pa operashonnan di droga den awanan internashonal.
Segun Wardakosta hustamente e barku di patruya ei, normalmente bisá den kombinashon ku un helikòpter, ta krusial den kombatimentu di trafikashonnan internashonal di droga. E barku ta poseé un alkanse operashonal grandi i detektornan ámplio pa struktura di imáhen i detekshon.
Den e relato di aña tin pará ku Merka a intensifiká su presensia militar fuertemente den e region via operashon Southern Spear. Wardakosta ta enfatisá firmemente ku “di ningun manera” e no tabata embolbí den operashon militar Merikano kontra kartelnan di droga rònt Venezuela.
Olanan di migrashon
Remarkabel ta ku apesar di e tenshonnan Wardakosta no a mira un oumento di ola di migrashon for di Venezuela. Na 2025 por a papia asta di un reduskshon di kasonan kaminda tabatin sospecho di kontrabanda di hende òf trafikashon di hende. Mayoria di personanan indokumentá tabata bini di Venezuela si.
Aña pasa Wardakosta tabata enfrentá tambe problemanan operashonal pa motibu di falta di personal i material opsoleto. Spesialmente e cutternan tabata nabegá ménos ku a plania pa motibu di un falta di personal spesialisá i mantenshon èkstra na barkunan ku ta birando opsoleto.