KRALENDIJK – UPB ke pa bini reglanan mas severo riba agènda di Konseho Insular di Boneiru dentro di algun siman pa loke ta trata uso di vapes, tabako i alkohòl, spesialmente bou di hóbennan. Ku esaki e partido di koalishon mas grandi ta uni su mes ku e yamada di èks-diputado Nina den Heyer pa traha mas rápido riba e lei nobo.
Segun bosero di UPB Jolinda Craane e tópiko tin basta tempu kaba riba agènda di e partido den Konseho Insular. “Frakshon di UPB ta trahando pa e bini dentro di e simannan benidero riba agènda,” segun Craane.
Segun Craane tin aktualmente un konsepto di ordenansa insular di konsehal Benito Dirksz, tambe debí na inisiativanan anterior di Den Heyer tempu ku e tabata diputado ainda. Ora a sigui elaborá riba e proposishon a disidí pa inkluí vape eksplísitamente den e prohibishon di huma i pa pone reglanan mas severo pa loke ta trata uso di alkohòl bou di hóbennan den un konsepto di ordenansa apart.
Ampliashon dosié
Segun UPB ampliashon di e dosié a kondusí ku e tratamentu a dura mas largu ku inisialmente tabata e intenshon. Na mes momento e partido ta rekonosé ku trayektonan di maneho mas biaha tin retraso pa motibu di falta di sufisiente sosten dentro di gobernashon.
“Nos ta apoyá e yamada pa enfrentá e realidat kompletamente. Protekshon di, spesialmente nos hóbennan, kontra konsekuensianan dañino di tabako, vapes i alkohòl ta rekerí leinan kla i un aserkamentu dinámiko,” Craane ta bisa na nòmber di partido.
UPB ta enfatisá ku un tratamentu rápido di e konseptonan ta nesesario na interes di salubridat públiko i protekshon di hóbennan na Boneiru.