ORANJESTAD – Wardakosta di Área di Karibe a interseptá djaweps 11 di yüni huntu ku e barku marino Hulandes Zr.Ms. Groningen un transporte di droga den Laman Karibe, serka di Aruba. A detené dos sospechoso i a konfiská un kantidat no konosí ainda di supstansianan narkótiko.
E avion di patruya di Wardakosta a deskubrí e boto sospechoso. Seguidamente Zr.Ms. Groningen a drenta akshon mésora. Durante e intersepshon a hasi uso tambe di un helikòpter di kombate NH-90-marítimo, dos interseptor rápido (FRISC’s) i un boto Metal Shark di Wardakosta.
A entregá e dos sospechosonan ku a detené i e droganan ku a konfiská na e punto di apoyo di Wardakosta na Savaneta i despues na Kuerpo Polisial di Aruba. Mientrastantu a destruí e droganan. No a duna mas dato di nashonalidat di e sospechosonan i e kantidat di droga ku a interseptá.
For di kuminsamentu di yüni Zr.Ms. Groningen ta e barku marino den área di Karibe. E barku ta supervisá seguridat di e islanan ABC i ta asistí Wardakosta di Área di Caribe na momento di entre otro kombatimentu di tráfiko di droga.