KRALENDIJK — Bonaire Basketball Federation ta anunciá ku orguyo un momento históriko pa basket riba nos isla. Pa promé biaha den historia, un ekipo femenino di basket di Boneiru ta sali for di e isla pa kompetí. E ekipo femenino U12 di BBF lo partisipá den torneo Her Way na Kòrsou.
E ekipo ta konsistí di Eliza Koeks, Kamilah Ramos i Danna Martinez, bou di guia di coach Eddy Carrillo. Nan partisipashon ta muchu mas ku solamente un torneo: e ta marka kuminsamentu di un ruta nobo di desaroyo pa mucha muhé den basket na Boneiru.
Durante hopi aña, mucha muhé na Boneiru ku tabata ke hunga basket tabatin poko oportunidat pa entrená òf kompetí den un ambiente solamente pa mucha muhé. BBF ta traha dirigí pa kambia e realidat aki, dor di organisá klinik pa mucha muhé, establesé entrenamentu semanal i sigui desaroyá e programa She Got Game. E esfuersonan aki ta krea un ambiente sigur i stimulante kaminda hóbennan por siña e wega, desaroyá konfiansa den nan mes i mira un futuro pa nan den basket.
E promé ekipo U12 aki ta un resultado importante di e trabou ei. Na Kòrsou, e tres hungadónan lo karga bandera di Boneiru i lo ta pionero pa e mucha muhénan ku lo sigui nan. Nan partisipashon tambe ta duna nan eksperensia internashonal balioso i ta mustra famianan riba nos isla ku basket femenino na Boneiru ta krese.
BBF lo sigui invertí den basket femenino ku entrenamentu struktural, desaroyo di hungadó i torneo, den kolaborashon ku Indebon i Nederlandse Basketball Bond (NBB). Meta di e federashon ta pa forma ekiponan femenino duradero den diferente kategoria di edat i, ku tempu, realisá un kompetensia femenino fuerte i sostenibel na Boneiru.