KRALENDIJK - Direktiva di STINAPA Bonairea disidí di entregá un denunsia relashoná ku sierto deklarashon hasí djamars anochi, 8 di sèptèmber, durante un transmishon di ENERGIATV tokante e Proyekto Parke Bunita, STINAPA mes i algun kolaboradó individual di nos organisashon.
Segun STINAPA ta bisa, durante e transmishon, tabatin sierto akusashon grave ku a bini padilanti tokante STINAPA i tokante algun di nos kolaboradónan ku ta traha ku e Proyekto Parke Bunita. Den tal deklarashonnan, a menta nòmber i fam di algun kolaboradó tambe. STINAPA a presentá e transmishon i e deklarashonnan hasí den dje na polis, i direktiva a tuma e desishon di hasi denunsia kontra e persona ku a hasi tal deklarashonnan, pa posibel difamashon i kalumnia.
STINAPA ke enfatisá ku e desishon akí no ta pa para òf suprimí krítika. Pregunta krítiko tokante STINAPA su labornan i tokante e Proyekto Parke Bunita ta bonbiní i mester por hasi pregunta asina. No opstante, aki direktiva ta di opinion ku a bai muchu leu, pasobra ta trata aki di akusashon falsu i perhudisial kontra trahadó individual ku a keda menshoná na nòmber i fam.
E reakshonnan ku tabatin riba medionan sosial komo resultado di e transmishon ta laga STINAPA komprondé bon kla ku e tipo di deklarashonnan ei por tin tambe konsekuensia pa siguridat di su kolaboradónan. Komo dunadó di trabou, STINAPA tin e responsabilidat di pèrkurá pa un ambiente di trabou sigur. P’esei, direktiva tin un obligashon di intervení ora ta pone siguridat òf integridat di su personal na peliger.
Proyekto Parke Bunita
Proyekto Parke Bunita ta un proyekto di restorashon ekológiko di mas aña na Washington Slagbaai National Park. Den e área ei, pa basta tempu kaba, kabritu ku ta kana lòs ta forma un peliger grandi pa e mondi tropikal. Nan ta kome planchi di palu i otro mata, strobando e mondi di rekuperá. Esei ta okashoná eroshon di suela tambe, pasobra ora tin yobida pisá, e awa tin mas chèns di spula e tera hiba laman. Komo resultado, sedimento i nutriente ta bin para den Bonaire National Marine Park i afektá kalidat di e awa i salú di e ref di koral.
P’esei, ta importante pa saka e invasornan ku ta kome mata, no solamente pa naturalesa riba tera, sino tambe pa protehá Boneiru su laman. Ademas, redukshon di e kantidat di bestia ku ta kana lòs kome mata ta forma parti di un maneho mas amplio di naturalesa pa Boneiru, i a identifiká esaki komo un medida klave pa restorashon di naturalesa.
Zona pa zona
Den e Proyekto Parke Bunita, STINAPA ta traha zona pa zona. A separá algun parti di e parke for di otro ku waya i despues a saka e kabritunan ku ta kana lòs for di e zonanan un pa un. A usa diferente método pa hasi esei, gara e bestianan bibu, kolaborá ku boluntario di komunidat, monitoriá ku kámara i usa GPS pa lokalisá e bestianan. Den e último añanan, a entregá mayoria di e bestianan komo donashon na komunidat, por ehèmpel, na kunukero, organisashon religioso i fundashon.
Ta tira bestia solamente ora e otro métodonan no duna sufisiente resultado i no por a saka e bestianan di otro manera debí ku e área ta muchu brutu i poko aksesibel. E meta no ta di mata bestia, sino di saka nan for di e área natural protehá, pa e vegetashon original haña chèns di rekuperá.
Entretantu, por mira e efektonan di esei kaba den algun área kaminda e impakto di e kabritunan a baha bastante. Palu yòn ta hañando un chèns di krese atrobe. Esei ta mustra kon importante ta pa sigui ku e trabou akí.
STINAPA ta komprondé ku e Proyekto Parke Bunita ta lanta pregunta i tambe emoshon. Kabritu tin masha nifikashon históriko i kultural na Boneiru. I ta p’esei mes STINAPA ta haña ku ta sumamente importante pa por tin espasio pa diálogo, pregunta i krítika tokante e aserkamentu akí.
Sinembargo, direktiva ta di opinion ku e diálogo ei mester tuma lugá a base di echo i ku e debido rèspèt pa e personanan ku ta ehekutá e trabou.
Para tras di empleado
Direktiva di STINAPA ta para tras di su personal. Krítika ta un parti normal di debate públiko. Pero STINAPA ta haña ku no por ta asina ku ta hasi akusashon personal i krea un situashon kaminda siguridat di su personal ta na peliger. Esei ta bai muchu leu. Ku e denunsia akí, direktiva ta vigilá pa no krusa e liña ei.