KRALENDIJK – Kasi un kuart di klientenan di Mental Health Caribbean ta mas hóben ku djesocho aña. E demanda pa kuido di salú mental bou di mucha i hóben ta kresiendo pa añanan kaba riba islanan BES, spesialmente despues di e pandemia di corona. Esei Kathelijne van den Boogert di Mental Health Caribbean ta bisa den un reakshon riba UNICEF Jongerenadvies 2026.
Den e konseho ei hóbennan na Boneiru, Sint Eustatius i Saba ta bisa ku problemanan mental ta nan preukupashon mas grandi. Van den Boogert ta rekonosé e senario ei den práktika diario. Mientrastantu 24 porshento di e klientenan di e organisashon di kuido ta menor di edat. E poblashon kresiente i e demanda pa kuido ku ta oumentá ta motibu ku tin listanan di espera.
Stres, miedu i tèrmentu
Mental Health Caribbean ta mira spesialmente problemanan sikososial, kaminda kehonan síkiko i e ambiente sosial ta influensiá otro. Ta trata di strès, tristesa, miedu, soledat, tèrmentu i problemanan na kas òf na skol.
Regularmente tèrmentu ta bini dilanti durante tratamentunan. “Hóbennan ta konta nos ku tèrmentu ta sosodé hopi biaha durante momentonan ku tin tiki supervishon, manera despues di skol, mientras nan ta warda pa bin buska nan”, segun Van der Boogert.
E ta boga pa mas terapista i pa invertí den prevenshon: rekonosé problemanan tempran, kombatimentu di pobresa i ayudo aksesibel. “Si rekonosé problemanan mas promé i trata nan, hóbennan por haña ayudo mas lihé. Ku esei por prevení den hopi kaso ku kuido mas pisá ta nesesario despues.”
Hóbennan mes ta mustra riba e eskases di sikólogo i terapista den e rapòrt. Pa kolmo riba e islanan mas chikí privasidat ta hunga un ròl: tin ku no ta tribi di buska ayudo pasobra tur hende konosé otro. “Por laga terapistanan bini di pafó di e isla”, un mucha muhé di djessinku aña ta bisa na Saba.
Lesa e rapòrt UNICEF Jongerenadvies 2026 aki.