KRALENDIJK – Kriabon ta mira su mes obligá pa, kuminsando 14 di sèptèmber 2026, adaptá temporalmente preisnan di un kantidat di produkto, entre nan kuminda pa bestia. E medida aki a bira nesesario komo konsekuensia di desaroyonan mundial ku ta sigui influensiá preisnan, aumento di gastunan di materia prima i e subida konsiderabel di gastunan di transporte i logístika.
Durante basta tempu Kriabon a hasi tur esfuerso pa absorbá e gastunan adishonal aki pa asina protehá su miembronan i kunukeronan di Boneiru kontra subida di preis. Sin embargo, Kriabon a yega na e límite di loke e koperativa mes por karga finansieramente. Sin un adaptashon temporal di preisnan, no solamente kontinuidat finansiero di Kriabon lo bin bou di preshon, sino finalmente tambe disponibilidat di kuminda pa bestia i otro produktonan esensial pa sektor agrario lokal.
Kriabon ta plenamente konsiente ku kualke subida di preis ta pone un peso adishonal riba nos kunukeronan. P’esei ta importante ku awor tambe for di parti di Gobièrno di Boneiru tin atenshon konkreto pa e problemátika aki.
Konseho Insular a aprobá un moshon dirigí riba fortifikashon struktural di e kadena agrario lokal i garantisá seguridat alimentario na Boneiru. Den e kuadro aki ta pone atenshon, entre otro, riba un relashon struktural entre gobièrno i Kriabon, inkluso un kontrato di kuido (zorgcontract) ku por sostené e servisio di interes públiko ku Kriabon ta brindando na sektor agrario.
Pa Kriabon esaki ta di gran importansia. Un sosten struktural asina por kontribuí pa Kriabon no tin ku pasa tur gastu ku e koperativa aktualmente ta kargando direktamente den preisnan di produkto. E meta final ta, asina ku e espasio finansiero ta pèrmití, bolbe baha preisnan pa kunukeronan i mantené nan strukturalmente riba un nivel pagabel.
Kriabon ke enfatisá ku esaki no ta trata solamente di situashon finansiero di e koperativa. Pa mas ku 40 aña Kriabon ta kumpliendo un funshon importante den komunidat agrario di Boneiru. Disponibilidat i preis pagabel di kuminda pa bestia i otro nesesidatnan agrario ta direktamente konektá ku kontinuidat di nos kunukeronan, kriadónan di bestia i, finalmente, ku seguridat alimentario di Boneiru.
P’esei Kriabon ta apresiá ku Gobièrno di Boneiru tin oído pa e nesesidatnan di nos kunukeronan i ku, mediante e moshon aprobá, a pone un base polítiko importante pa yega na un solushon struktural.
Den e kuadro ei mester mira e adaptashon aktual di preisnan enfátikamente komo un medida temporal i nesesario, i no komo e rumbo struktural ku Kriabon ta deseá.
Kriabon lo sigui ku e konsultashonnan ku Entidat Públiko Boneiru pa por duna ehekushon na e moshon aprobá mas pronto posibel i yega na un areglo struktural i praktikabel. Den esaki Kriabon ta mantené un meta sentral: un sektor agrario lokal fuerte, produktonan na preis pagabel pa nos kunukeronan i garantia duradero di seguridat alimentario di Boneiru.