KRALENDIJK - Dia 21 di mei último Direktorado Komunidat i Kuido di entidat públiko Boneiru, den kuadro di e programa “Trahando riba Prosperidat i Bienestar di Boneiru” a produsí un programa piloto ku ta hiba e título ‘E kaminda pa prosperidat’.
E promé skol ku a partisipá na e programa piloto aki tabata BS de Pelikaan. Esaki ta un programa kreá i diseñá pa Financially Fit Kids Foundation. E programa aki ta konsistí di un lès ku durashon di un ora i mei spesialmente pa hóbennan di grupo shete i ocho di skolnan básiko.
Durante di e lès aki e hóbennan ta siña diferente faktor ku ta yuda nan manehá nan sèn mihó. Poniendo enfoke riba sparmentu, kalkulá, tomo di desishon promé ku saka sèn na gastunan innesesario, invertí bo sèn pa e rende pa den futuro nan mes por logra nan soño i metanan. Den un manera dibertido, edukativo i hopi interkambio a trese e temanan aki dilanti na e hóbennan.
E lès aki ta forma parti di un proyekto ku den su totalidat lo bai terminá den nos Siman di Sèn ku lo tuma lugá na luna di novèmber próksimo.
Meta di nos programa piloto ta pa hasi uso di e métodonan ku ta kumpli ku nos vishon pa nos hóbennan su futuro finansiero. Dunando e programa nos por ahustá kaminda ta nesesario pa asina nos meta i vishon por kristalisá den un Boneiru ku hóbennan kla pa enfrentá nan futuro finansiero den un manera sano.
Impakto
E direktorado ta bisa di por mira bèk riba un dia super informativo pa e hóbennan kaminda sigur nos a logra hasi un impakto, motivá i stimulá nan pa nan maneho di sèn por bira unu sano. For di spar te na invertí.