KRALENDIJK – E A-tim Boneriano ta keda impreshoná durante e torneo PONY Caribbean Mustang 10U 2026. Despues di un fase di grupo perfekto, kaminda a gana tur partido, Boneiru a posishoná su mes pa semifinal. Einan ta warda nan di nobo Panama, un kontrinkante ku nan a derotá anteriormente den e torneo ku skor di 13-4.
E semifinal ta riba programa pa djaluna mèrdia 1’or. Si Boneiru gana atrobe di Panama, e ora ei ta sigui e mèrdia ei mes pa mitar di sinku e gran final di e torneo hubenil internashonal.
Hopi públiko
Mientrastantu e torneo ta biba enormemente na Boneiru. E espektativa ta ku djaluna mèrdia kasi tur fanátiko di beisbòl lo ta pará kantu di fèlt pa apoyá e tim hubenil pa un posibel lugá den final.
Pa Boneiru B e torneo a kaba mas promé ku a spera. E tim no a logra klasifiká pa semifinal, pero a haña si eksperensia internashonal balioso kontra paisnan fuerte di den region.
Screenshot
Un pasashi pa Merka
E motivashon serka e A-tim ta èkstra grandi, pasobra di nobo tin hopi reto. Aña pasá e tim U9 di Boneiru a gana final na Barranquilla, Colombia, pa despues e tim por a biaha pa Merka pa representá einan region di Karibe. E aña aki atrobe e ganadó di Caribbean Zone Tournament ta gana un pasashi pa Merka, kaminda e mihó timnan hubenil di diferente pais ta bini huntu pa e kampionato mundial.
Ku un státus invikto, hopi konfiansa propio i apoyo di públiko di kas Boneiru ta spera di por skirbi historia atrobe djaluna.