KRALENDIJK – E akshon di sosten pa famia di e konosido músiko i amante di kultura Payo ta sigui krese. Mientrastantu a rekoudá miles di euro kaba pa rehabilitashon di e kunuku ku a sufri hopi daño ora anteriormente kandela a destruí tur kos. E famia ta hopi konmoví pa tur sosten di komunidat.
Primu Yannick Cicilia ta konta ku e famia no a ferwagt nunka ku asina hopi hende lo a yuda. “Kada un kos chikitu ta yuda. Nos mes no a asumí ku nos lo a alkansá e montante aki,” e ta bisa. Na mes momento e ta enfatisá ku e daño real ta hopi mas grandi ku e montante di sèn so ku ta rekoudando awor aki.
Segun Yannick no ta solamente panelnan solar, djènereiter i instalashonnan tékniko a bai pèrdí, pero tambe artíkulonan ku un balor emoshonal enorme.
“Albùmnan ku pòtrètnan di antes, rekuerdonan di miembronan di famia ku a muri, kosnan ku nos bisa bisa welo a laga atras ku bo no ta haña nunka mas bèk,” e ta bisa.
Sitio di enkuentro spesial
E kunuku tabata pa añanan largu un sitio di enkuentro pa famia, amigunan i habitantenan di bario. Tabata tene fiesta einan, hasi muzik i tambe kompartí momentonan difísil huntu. “E tabata un sitio kaminda famianan tabata bini huntu. Asta despues di entiero nos tabata sinta huntu einan. E tabata un lugá ku hopi rekuerdo,” segun Yannick.
E kousa di e kandela no ta konosí ainda. Segun e famia e problemanan a kuminsá na momento ku suministro di koriente via e djènereiternan a kai afó. Djis despues di esei tabatin vários ekploshon tras di otro. “Tres djènereiter a eksplotá,” Yannick ta bisa.
Ounke por a skapa e kas mes, danki na intervenshon rápido di presentenan i brantweer, e kushina pafó, bar, kamber di makinaria i kònteiner di depósito a bai kompletamente pèrdí. Suministro di awa i koriente tambe a sufri hopi daño. E famia ta biba aktualmente ku fasilidatnan di emergensia temporal.
Sistema nobo
Pa solushoná e situashon strukturalmente e famia ke invertí den un sistema di energia solar nobo. Un oferta resien pa un instalashon kompleto ta sali alrededor di 13.000 euro. “Despues di loke a pasa mi tio no ta riska di konfia mas kompletamente riba djènereiternan,” Yannick ta konta.
Apesar di tur kos e famia ta keda sorprendí pa e partisipashon enorme di komunidat. Mientrastantu mas ku shen hende a hasi donashon kaba. Komo muestra di gradisimentu e famia ke pone nòmber di tur kontribuyente riba un pankarta grandi òf un muraya na e kunuku renobá. “Nos ta bai gradisí kada un personalmente,” Yannick ta bisa.