KRALENDIJK – Trabounan na Jossy Boekhoudt Ballpark na Boneiru ta sigui, Federashon di Beisbòl i Sòftbòl Boneriano (FBSB) ta informá. Ta pone hèkwèrk rònt di e fèlt di beisbòl i despues realisashon di un tribuna kubrí ta riba programa.
E federashon di beisbòl i sòftbòl ta papia di un bunita desaroyo pa deporte riba e isla. E trabounan ta forma parti di kontinuashon di mehorashon di e akomodashon.
FBSB ta hasi un yamada na mes momento riba usuarionan pa trata e fasilidatnan ku kuidou. Segun e federashon ta responsabilidat komun di usuarionan pa tene e fèltnan nèchi i den bon estado.
E trabounan ta bini despues di invershonnan anterior den fasilidatnan di beisbòl na Boneiru. Direktor di Indebon Terrence de Jongh a bisa anteriormente kaba ku ta bai atendé diferente akomodashon di deporte riba e isla.