KRALENDIJK — E hoben belero , Rocquí Martis, konosí pa medio di su inisiativa di nabegashon ‘Pebble in Motion’, a kompletá ku éksito su promé trayekto di entrenamentu saliendo for di Kas di Regatta pa Sorobon i regresa Kas di Regatta bèk den 8 ora, markando un otro logro importante den su preparashon pa e Kampionato Mundial 2026 na St. Croix, planiá pa novèmber.
E rekorido desafiante aki ta forma parti di e programa di entrenamentu intensivo di Martis diseñá pa konstruí resistensia, mehorá su abilidatnan i prepar’é pa e eksigensianan di kompetensia internashonal. Kompañ’é riba e trayekto tabata suentrenador i kompañero di ekipo, Dedrie Pedersen, kende ta sigui hunga un ròl klave den su desaroyo atlétiko.
Photo: Pebble in motion
E rekorido di resistensia ta reflehá e kompromiso di Martis pa pusha su límitenan konstantemente i bira un belero mas fuerte i kompleto.
Despues di su partisipashon na e Kampionato Mundial 2025 na Ecuador, kaminda el a terminá na di 76 lugá, Martis a pone su bista riba un mehorashon signifikante. Kada seshon di entrenamentu, kada kareda, i kada reto ta parti di su determinashon pa bira un mihó vershon di su mes i orguyosamente representá Boneiru riba esenario mundial.
Oportunidat pa siña i krese
“Kada entrenamentu ta un oportunidat pa siña i krese,” Martis a bisa. “E rekorido di entrenamentu aki tabata tokante mas ku kubri e distansia. E tabata tokante konstruí e resistensia físiko i mental nesesario pa kompetí ku e mihónan na mundu. Mi meta ta pa yega St. Croix mas fuerte, mas prepará i kla pa mehorá e resultado di aña pasá.”
Pa medio di Pebble in Motion, Martis ta spera tambe di por inspirá e próksimo generashon di nabegante na Boneiru. Dor di kompartí su trayekto, e ke mustra hóbennan ku dedikashon, perseveransia i trabou duru por kondusí na oportunidatnan mas aya di e isla miéntras ta promové e deporte di nabegashon den e komunidat.
Photo: Pebble in motion
Invitashon pa sigui e progreso
Segun ku e preparashonnan ta sigui pa e Kampionato Mundial 2026, Martis ta invitá e públiko pa sigui su trayekto i ta parti di su progreso. Sostenedónan por keda na altura di su entrenamentu, kompetensianan i logronan dor di sigui Pebble in Motion riba Facebook i Instagram.
Pa Martis, kada miya náutiko nabegá ta un paso mas pa representá Boneiru ku orguyo riba tereno internashonal.