WILLEMSTAD – Kòrsou ta haña un struktura nobo di gobièrnu pa garantisá siguridat alimentisio riba e isla. Konseho di Minister a aprobá ayera lantamentu di un grupo piloto interministerial pa siguridat alimentisio.
E struktura mester pèrkurá pa miho koperashon entre ministerionanan pa produkshon di kuminda, disponibilidat i stabilidat di preis.
E isla ta hopi dependiente di importashon di kuminda. Esei ta trese riesgonan kuné: subida di preis, desbalanse riba merkado mundial i problemanan ku transporte por menasá siguridat alimentisio.
Kuater ministerio ta traha huntu
Ta trata di ministerio di Desaroyo Ekonómiko, ministerio di Salubridat Públiko, Medio Ambiente i Naturalesa i ministerio di Tráfiko, Transporte i Planifikashon Urbano.
Bou di e grupo piloto di e ministerionan aki ta traha un grupo di proyekto ku ta ehekutá e plannan. E grupo aki ta guiá pa direktor di Servisionan Komersial di Desaroyo Ekonómiko i ta pèrkurá pa e ehekushon práktiko i vigilansia di e medidanan.
Segun gobièrnu siguridat alimentisio ta mas ku solamente agrikultura. E ta mishi tambe ku problemanan ekonómiko, salubridat públiko i planifikashon urbano.
Kiko e grupo di proyekto ta bai hasi?
E grupo di proyekto ta haña sinku tarea prinsipal. Promé nan mester ehekutá e plannan pa loke ta trata siguridat alimentisio, intensifiká regla- i leinan i stimulá koperashon entre gobièrnu, empresa- i kunukeronan. Tambe e mester bini ku proposishonnan pa modernisá agrikultura i peskeria i promové produkshon duradero di kuminda ku ta resisitente konta kambio di klima.
E desishon ta pas den pasonan ku a tuma promé den e parti Karibense di Reino. Hulanda por ehèmpel a lanta un fondo pa siguridat alimentisio, ku su meta ta pa stimulá produkshon lokal i hasi e isla ménos vulnerabel pa fluktuashonnan di preis.
Kiko esaki ta nifiká pa e habitantenan?
E aserkamentu nobo mester pèrkurá ku kuminda ta bira mas disponibel i pagabel na Kòrsou. Gobièrnu ta spera ku, siendo ménos dependiente di importashon, por limitá fluktuashonnan di preis.