KRALENDIJK – Durante un konferensha organisá pa Tourism Corporation Bonaire (TCB), Veroesjka de Windt, direktor di Bonaire Hotel and Tourism Association (BONHATA), a presentá un resumen di e prestaron di sektor hotelero na 2025 i e espektativanan pa e prókimo aña. E sifranan presentá ta mustra ku hotèlnan na Bonaire a realisá preis di kamber mas haltu e aña anterior.
Segun De Windt, e okupashon di hotel na 2025 tabata 66 porshento. E preis promedio di kamber (Average Daily Rate, ADR) a subi te 268 dollar pa nochi, kompará ku 226 dollar na 2024. Tambe e entrada pa kamber disponibel (RevPAR) a yega na 177 dollar, un indikador ku ta kombina tantu e okupashon komo e preis di kamber.
Un komparashon di e preis di kamber mensual ta mustra ku e tarifanan na 2025 tabata mas haltu ku esnan na 2024 durante kasi henter e aña, spesialmente durante e último lunanan di e aña.
Durante e enkuentro, por a skucha tambe krítika for di e sala. Representantenan di sektor hotelero a indiká ku nan ta sinti ku nan ta risibí poko apoyo di Kolegio Ehekutivo di Boneiru. Ademas, nan a ekspresá preokupashon tokante e desaroyonan resien den e tráfiko aéreo pa e isla.
Posishon kompetitivo
Spesialmente e echo ku buelonan di JetBlue a kan afó ta ser menshoná komo un punto di preokupashon. Segun representantenan di sektor, esaki no ta nifiká solamente ménos asiento disponibel for di Merka, pero posiblemente tambe preis di pasashi mas haltu pa buelo pa Boneiru. Segun nan ta mustra, esaki por afektá e posishon kompetitivo di e isla komo un destino turístiko.
E sifranan i diskushonnan a mustra ku, di un banda e sektor ta benefisiá di preis di kamber mas haltu, pero na mes momentu tin tamce preokupashon tokante e aksesibilidat di e isla i e apoyo di gobièrnu insular.