WINDWARDSIDE, Saba – Fondo di Penshun Karibe Hulandes (PCN) a konmemorá siman pasá su di diessinku aniversario. E selebrashon na Saba a kai huntu ku apertura di e propiedat nobo Scenery Hotèl, ku a ser finansiá pa e fondo.
Presidente di e direktiva, Harald Linkels, a repasá en breve historia di e fondo ku a keda fundá nèt promé ku Boneiru, Sint Eustatius i Saba haña un posishon nobo den Reino Hulandes.
E fondo, ku ya pa algun aña konosé un estado finansiero hopi faborabel, den su historia a pasa tambe den tempunan difísil. Por ehèmpel, na 2017 e fondo mester apliká un redukshon di 3,5% riba benefisionan di penshun. Debí na e desaroyo faborabel di e situashon finansiero durante último añanan, e fondo no solamente por duna un indeksashon kompletu pa subida di preis den e añadan tras di lomba, pero a logra kompensá tur pensionado i afiliado tambe pa e redukshon na aña 2017.
Invershonnan
Den e último añanan, e portfolio di invershon lokal di e fondo a krese tambe di forma kontinuo. "Komo direktiva nos ta haña importante pa invertí tambe den ekonomia di e islanan na unda nos miembronan ta biba i traha, i asina yuda realisá un resultado stabil i positivo", Linkels a bisa.