KRALENDIJK – E grupo di kanadó di mondi Chantiwawa ta bai organisá un kaminata di distansia largu di 50 kilometer djadumingu dia 6 di desèmber benidero. Ta anunsiá esaki ku tres luna di antisipashon, pa asina esnan ku ke partisipá tin chèns di prepará, pasobra no ta un kaminata fásil. Chantiwawa ta un grupo di kanadó eksploradó ku a forma bou di alanan di Fundashon Históriko Kultural Boneriano – FuHiKuBo.
E kaminata ta kuminsá pa 4or di mardugá djadumingu 6 di desèmber na Willemstoren, den boka di pueblo ‘Torno di Sùit’, i ta terminá na e torno di Malmok den Parke Nashonal Washington. Por sierto un torno históriko ku nunka a funshoná.
Un kalkulashon ku Chantiwawa a hasi ta indiká ku e promé kanadónan lo kuminsá yega final despues di 1or pa 2or di tra’i mèrdia. Na kaminda Chantiwawa huntu ku INDEBON lo sòru pa pòstnan di awa, fruta i sòpi pa e kanadónan ku riska bai e desafio aki.
Aparte di a papia ku INDEBON tokante nan asistensia i konseho, Chantiwawa a reuní tambe ku STINAPA, konsiderando ku e último parti di e ruta ta pasa den e parke.
No ta promé bes ku ta organisá e kaminata aki. Masoménos 20 pa 25 aña pasá tambe e organisá e kaminata aki via tres otro ruta, esta via Slagbaai i via Playa Frans Slagbaai.
Den e siman i lunanan benidero esnan interesá por inskribí via whatsapp na number di telefon +599-7005964 Ta importante pa inskribí for di awor, komo ku lo tin un límite máksimo di 100 partisipante. Inskripshon ta kosta 20$.