WILLEMSTAD, Kòrsou – Dieseis rekruta di Aruba, Kòrsou, Sint Maarten, Saba i St. Eustatius a kumpLí ku éksito e programa di Junior Kustwacht Bemanningslid (JBK) di e Wardakosta Karibe Hulanda, despues di mas di un aña di formasjon.
Entre e graduadonan tin e promé persona di St. Eustatius ku a kaba e programa JBK ku éksisto. E graduado di Statia ta ademas un hende muhé, ku lokual su logro ta un primesia dòbel. E mihó graduado di e aña aki ta tambe un hende muhé, di Aruba.
Pòtret: Wardakosta
E programa JBK ta prepará rekrutanan pa tareanan operashonal den e Wardakosta. E formashon a inkluí operashonnan marítimo i prosedimentonan di boarding, pero tambe promé auksilio, manehamentu di arma, desaroyo físiko i mental i mantenshon di lei. E último parti aki, ku ta inkluí lei penal, prosedimentonan di detenshon, reportahe i defensa personal, a wòrdu duná den kooperashon ku e Institúto di Formasjon Handhaving di Lei i Seguridad (ORV).
E rekrutanan a hañá tambe eksperensia prátiko durante stagionan i entrenamientonan riba varios islanan i abordo di botonan di Wardakosta.
Despues di nan graduashon, e 16 rekruta ta wordu promové na e rango di Matroos i ta kuminsá ku tareanan operashonal den e Wardakosta Karibe Hulanda.