KRALENDIJK – Tourism Corporation Bonaire (TCB), Fundashon Cocari II i Fundashon Historiko Kultural Boneriano (FuHiKuBo) a firma un akuerdo di kolaborashon ku tin komo meta pa fortifiká Boneiru su historia, patrimonio kultural i monumentunan dentro di desaroyo turístiko di nos isla.
Segun TCB ta bisa, e kolaborashon ta reflehá Boneiru su aspirashon pa yega na turismo di balor haltu, sostenibel i riba eskala chikitu, kaminda e énfasis ta riba krea balor agregá i mas eksperensia signifikativo. Pa medio di e kolaborashon akí e tres organisashonnan ta bai komprometé nan mes pa konservá, interpretá i duna bida na patrimonio boneriano na un manera ku ta benefisiá tantu habitantenan, empresanan lokal komo bishitantenan.
Pòtret: TCB
“Historia i patrimonio di Boneiru ta pertenesé na promé lugá na nos pueblo. Ku e kolaborashon akí nos ke sòru pa no solamente konservá nos storianan, pero ku na un manera outéntiko i respetuoso hende por eksperensiá i kompartí nan i pasa nan pa otro”, segun Elesiër Angel, direktor di Tourism Corporation Bonaire.
E kolaborashon ta bai enfoká riba kuater área prinsipal: desaroyo di eksperensia outéntiko di patrimonio; fortifiká visibilidat i kontamentu di storia tokante patrimonio di Boneiru; amplia konosementu i midi kontribushon di esaki na turismo; i enbolbí habitantenan i hóbennan pa medio di enseñansa, formashon di guia, nos idioma papiamentu i tradishonnan lokal.
Potensial inisiativanan ta entre otro rutanan i eksperensianan di patrimonio ku ta konektá ku historia marítimo di Boneiru, ku Rincon i ku e lanthùisnan históriko di nos isla. E partnernan ta bai eksplorá posibilidatnan tambe pa konektá patrimonio ku gastronomia lokal, artesania, hospitalidat i empresariado lokal, di manera ku mas habitante i empresa por benefisiá di turismo.
“Patrimonio di Boneiru, pa Boneiru,” segun J. (Jan) de Vries, direktor di Fundashon Cocari II. “E kolaborashon akí ta hasi posibel pa nos konektá konservashon i reuso adaptivo na enseñansa, partisipashon lokal i eksperensia outéntiko di bishitante. Pa nos kada proyekto tin ku kumpli ku e mesun kriterionan: e ta krea empleo i oportunidat? E storianan ta keda serka e hendenan ku nan ta pertenesé na dje? I e balor ta keda na nos isla?”
“Kontamentu di storia na un manera eksakto i rèspèt pa nos historia, tradishonnan i idioma mester forma e base pa kada inisiativa di patrimonio,” segun Bòi Antoin di FuHiKuBo. “E kolaborashon akí ta brinda habitantenan di Boneiru un oportunidat importante pa keda doño i protektor di nan propio historia.”
Pòtret: TCB
Grupo di trabou konhunto
Un grupo di trabou konhunto ta bai koordiná e kolaborashon i formulá un programa anual di trabou ku prioridatnan, responsabilidatnan i liñanan di tempu konkreto.
Tambe e partidonan ta bai eksplorá konhuntamente e posibilidatnan finansiero pa proyektonan di futuro i buska kolaborashon ku instansianan di gobièrnu, organisashonnan kultural i otro partnernan den nos komunidat.