KRALENDIJK – Durante Regata 2026 lo tin un prohibishon temporal di bòter i otro enbase di glas pa bebida den algun parti di sentro di Playa. E medida ta konta for di 11 te ku 18 di òktober, tur anochi di 18:00 te 06:00 or.
Gezaghèber a tuma e desishon despues di konsultashon ku e triángulo di seguridat, ku e meta di prevení aksidente i herida kousá pa glas kibra.
Durante e oranan indiká ta prohibí pa tin òf transportá bòter di glas ku bebida den e área designá, asta ora e bòter ta será. E prohibishon ta konta tantu riba kaya komo den lokalnan di horeca i nan terasanan.
Establesimentunan di horeca no mag sirbi bebida den bòter di glas, pero por sigui usa glas normal pa sirbi bebida den nan lokal òf riba nan terasa. No ta permití pa hiba e glasnan aki riba kaya.
E medida ta aplikabel den un parti di sentro di Kralendijk, inkluyendo Kaya Grandi, Kaya Bonaire i partinan di Julio A. Abraham Boulevard.