KRALENDIJK – CBS Karibense Hulanda ta hasi un yamada na habitantenan pa keda alerta pa un mensahe ku ta sirkulá aktualmente riba medio sosial. Den e mensahe ei ta advertí pa personanan ku lo por hasi manera ku nan ta traha pa un instituto di estadístika pa reuní datonan personal, potrètnan òf datonan biométriko.
Segun CBS Karibense Hulanda, na e momento aki no tin ningun prueba ku ta indiká ku personanan asina ta aktivo na Boneiru. E mensahe ta sirkulá kaba tempu den diferente paisnan i parti di e region Karibe, kaminda e kontenido ta wordu adaptá tur biaha na e situashon lokal.
CBS ta enfatisá ku empleadonan ku ta ehersé investigashonnan estadístiko semper ta informá e hogarnan i empresanan selektá ku antisipashon. Ademas, ora nan bishitá, nan por legitimá nan mes ku un pas di legitimashon ofisial di CBS ku nòmber i potret. Tambe, CBS nunka ta pidi datonan biométriko, manera imprenta di dede, ni ta saka potrèt di personanan òf di nan dokumento di identidat komo parti di un investigashon estadístiko.
Habitantenan ku tin duda tokante e identidat di un persona ku ta bisa ku e ta traha na nòmber di CBS, ta wordu konsehá pa no duna datonan personal te ora nan a verifiká e identidat di e persona.