AMSTERDAM — Representantenan di organisashonnan di LGBTQIA+ i di derechonan humano di Aruba, Boneiru, Kòrsou, Sint Maarten i Saba a tuma parti huntu e siman aki na WorldPride na Amsterdam. Riba inisiativa di fundashon EQ Boneiru, diesdos representantenan for di e parti Karibense di Reino a biaha pa Hulanda pa pidi atenshon pa igualdat, rèspèt i aseptashon.
Un di e puntonan haltu riba e agènda tabata nan partisipashon den e Canal Parade di 1 di ougùstùs. E delegashon a nabegá riba e boto di Ministerio di Enseñansa, Kultura i Siensia (OCW), ku bandera di Boneiru i Kòrsou, huntu ku kartelnan ku e mensahe “Rèspèt!” i e slogan “Nos t’ei, We are here.”
Inspirashon i nesesidat di lugánan di enkuentro
Segun e partisipantenan, visibilidat ta di hopi importansia. Egmar Irausquin di Fundacion Orguyo na Aruba ta señalá ku intoleransia ta kresiendo na mundu, pero e ta bisa ku e apoyo visibel na Amsterdam ta un fuente di inspirashon. Tantu el komo Caroline Singh di EQ Boneiru ta boga pa un lugá permanente di enkuentro na e islanan, komparabel ku COC na Hulanda, i pa mas informashon, edukashon i orientashon tokante diversidat seksual i di género, spesialmente pa hóbennan.
Diskriminashon i kolaborashon
Nadjesca Gumbs di Sint Maarten/Saint Martin Alliance for Equality ta indiká ku e komunidat regularmente ta enfrentá komentario diskriminatorio, tantu for di sierto lidernan religioso komo via retnan sosial. Charlysen Jansen di Kòrsou, sinembargo, ta mira e balor di kolaborashon entre e islanan: kompartí eksperensianan i siña for di otro. Despues di e atake durante Pride na Berlin, el a sinti ku tabata mas importante ainda pa ta presente i visibel.
Boluntario i finansiamentu
Un reto ku tur e organisashonnan ta kompartí ta haña sufisiente boluntario i aliado ku ta dispuesto pa mustra nan apoyo públikamente. Ministerio di OCW, entretanto, ta trahando riba finansiamentu pa proyektonan ku durante e próksimo tres aña mester kontribuí na fortalesementu di e posishon, seguridat i visibilidat di e komunidat LGBTQIA+ riba tur seis islanan Karibense di Reino.