KRALENDIJK – Business Federation Bonaire (BFB) a hasi di nobo un apelashon urgente riba minister David van Weel di Hustisia i Seguridat pa reforsá temporalmente e kapasidat polisial na Boneiru. Motibu pa esaki ta un kiebro nobo di djaluna pa djamars, kaminda Bondigro tabata e víktima.
Segun presidente Paul Coolen esaki ta di dos biaha den korto tempu ku e organisashon empresarial ta dirigí su mes por eskrito na e minister sin ku nan a risibí un kontesta relashoná ku e kontenido. Riba 25 di yüni BFB a hasi petishon kaba pa kapasidat polisial èkstra di Reino pa motibu di kriminalidat ku ta oumentando. Riba 22 di yüli a sigui un rekordatorio despues ku segun e organisashon e situashon a sigui empeorá. Te ku awor un reakshon relashoná ku e kontenido a keda afó.
Den e karta nobo Coolen ta skirbi ku empresarionan ta haña e sentimentu ku no ta tuma nan preukupashonnan na serio. “Mientrastantu nos ta desesperando,” segun e presidente. E ta mustra ku empresarionan ta invertí, ta krea oportunidat di trabou i ta kontribuí na ekonomia, pero na mes momento ta haña nan konfrontá mas i mas ku kiebronan, gastunan di daño haltu i un sentimentu kresiente di inseguridat.
E federashon ta enfatisá ku no mester interpretá e yamada komo krítika riba esfuerso di Kuerpo Polisial Karibe Hulandes. Segun e organisashon ta konosí ku un ampliashon struktural di e kuerpo ta tuma tempu. Hustamente p’esei a pidi pa asistensia temporal di otro partinan di Reino, di moda ku riba término korto kapasidat èkstra ta bini disponibel.
E organisashon empresarial ta bisa ku e kiebro nobo na Bondigro ta suprayá di nobo kon urgente e situashon ta. “No pasobra nos ke ripití e mésun mensahe. Pero pasobra e realidat ta forsa nos hasi esei,” Coolen ta skirbi e minister.
Den e karta anterior Business Federation a referí na diferente rapòrt di gobièrnu i dokumentonan di Kamer kaminda ta mustra ku e problemanan di kapasidat dentro di aplikashon di lei ta konosí pa basta tempu kaba. Na mes momento ta mustra riba e okupashon abou serka Kuerpo Polisial Karibe Hulandes, yamadanan anterior di gezaghebbernan di Boneiru, Sint Eustatius i Saba i rapòrtnan di Konseho pa aplikashon di Lei kaminda ta boga pa refuerso struktural di e kadena hudisial.
Lesa aki tambe e yamada kolektivo di empresario- i siudadanonan tokante e kriminalidat ku ta oumentando i e importansia di refuerso di órden públiko i seguridat na Boneiru