KRALENDIJK – A anunsiá e programa di Regata 2026 relativamente lat. Spesialmente e sitio nobo di e podio prinsipal ta yama atenshon. Si anteriormente e podio tabata na Plaza Wilhelmina banda di e anterior Kolegio Ehekutivo, ta pone e esenario prinsipal e aña aki den sentro di siudat. E kambio ta kondusí na preguntanan di fluho di tráfiko, seguridat i konsekuensia pa empresarionan.
Na e sitio kaminda e podio prinsipal mester bini, ta trahando ful spit awor aki. Entidat Públiko Boneiru (OLB) a bisa anteriormente ku e trabounan aki no tin nada ke ber ku Regata. Awor ta resultá ku hustamente na e sitio aki ta konstruí e podio prinsipal.
Den e organisashon di Regata mes tabatin promé duda di e sitio nobo. Finalmente a skohe tòg pa sentro di siudat. Ku esaki ta konsentrá e evento na un sitio kaminda durante Regata hopi tráfiko i bishitante ta bini huntu tambe.
Desishon despues di konseho di tim di APK
Gezaghebber John Soliano ta bisa Bonaire.nu ku no tabata konosí serka dje ku for di e organisashon tabata sali informashon ku KPCN a duna un konseho negativo tokante e sitio.
Segun Soliano e konseho di e asina yamá tim APK (Algemeen Plaatselijk Keuringsteam = Tim General Lokal di Inspekshon), kaminda KPCN tambe ta representá, sí tabata parti di e toma di desishon. A base di e konseho ei a disidí pa kambia e sitio di e esenario prinsipal.
“E konseho di e tim di APK, kaminda KPCN tambe ta forma parti, tabata e base di e toma di desishon di Kolegio Ehekutivo pa skohe un otro sitio”, segun Soliano.
Seguidamente gezaghebber a indiká di no duna pèrmit pa un esenario prinsipal na e sitio original ku ta e lugá di stashoná outo banda di e edifisio di kolegio ehekutivo anterior.
Ku esaki no a konfirmá ku KPCN a konsehá pa kambia e evento pa e sentro. KPCN ta konfirmá serka Bonaire.nu sí ku polis a duna konseho tokante esaki. E kontenido di esaki ta konfidensial.
“KPCN enberdat a duna konseho, pero e kontenido ta konfidensial. Gabinete di Gezaghebber ta e resipiente i doño di e produkto di e konseho”, segun polis. Bonaire.nu a entregá un petishon WOB pa haña akseso na e konseho.
No a informá empresarionan
Mientrastantu e sitio nobo ta trese diferente reakshon bou di empresarionan den sentro di siudat. Remarkabel ta ku diferente empresario ta indiká ku OLB no òf kasi no a informá nan ku ta bai pone un podio prinsipal.
Un empresario ku ta bisa ku anochi e no ta aktivo, ku e tin prinsipalmente miedu di molèster rondó di su edifisio. “Nos no ta traha anochi i tur aktividat di regata ta anochi. Nos tin un edifisio habrí i tin miedu ku hendenan ta bai pishi riba nos tereno i tira sushi i sobrá di kuminda. Den dia nos no ta mira problema. OLB no a puntra nos opinion. Nos ta spera ku e hendenan ta bai komportá nan.”
Un otro empresario ta preukupá pa konsekuensianan pa su pakus. Segun e empresario aki seramentu di e kaya pa tempu largu e último luna i mei tabatin konsekuensia kaba pa benta. “Mi ta hopi preukupá. No tabatin komunikashon for di OLB. Último un luna i mei tambe e kaya tabata será, esaki tabatin konsekuensia grandi pa benta den nos pakus.”
No tin lugá pa stashoná outo
Durante Regata tambe e empresario ta fèrwagt problema. Pa motibu di e evento ta kita e lugánan di parker i e podio prinsipal ta bin para banda di e pakusnan. “Durante Regata tampoko tin lugá di parker outo, esei ta kosta nos kliente. E esenario prinsipal ta pará den direkshon di nos pakus. Nos tin miedu pa hende burachi, pasobra den sentro di siudat awor kaba hopi biaha tin bringamentu anochi.”
Segun e empresario molèster ta visibel kaba den e área. “Durante fin di siman ta uriná kaba kontra mi porta di pakus i tin kùp tur kaminda tirá.” E empresario ta haña ku e luga di stashoná outo tin un funshon komersial i no ta apto pa Regata.
Preukupashon spesialmente pa sushi i uriná den públiko,
No ta tur empresario ta negativo ku binimentu di e evento. Un di tres empresario ta bisa ku e no ta preukupá tantu pa ladronisia, pasobra ta bai pone kámara. “Mi no ta preukupá pa ladronisia. Ta bai pone kámara tambe. Mi ta mas tantu preukupá pa e komportashon di uriná i sushedat. Mi no ta mira ègt un problema.”
E empresario aki tambe ta kritiká e komunikashon defisiente. “Mi no sa kiko nan plan ta presis, mi no a mira nada i OLB no ta komuniká nada pa komersiantenan.”
Un di kuater komersiante tampoko ta mira problema grandi pa su propio nogoshi, pero si lo a apresiá di a risibí informashon delantá. “Mi no a tende masha. E podio ta bini kantu di e pakusnan. OLB no a bisa ami nada. Nos no ta bai hasi nada ku nos pakus.”
Tráfiko i seguridat
Kambio di e esenario prinsipal pa e sentro ta nifiká ku un parti di sentro di siudat lo no ta aksesibel òf lo tin akseso limitá pa tráfiko. Ku esaki no ta surgi solamente un reto logístiko pa e organisashon, pero tambe pa empresario- i habitantenan den e área.
E kontenido eksakto di e konseho di seguridat di e tim di APK i KPCN no ta públiko. Sí ta sigur ku e konseho a hunga un ròl den e toma di desishon pa no usa e sitio original.
E pregunta ta keda te unda e sitio nobo ta tene sufisiente kuenta ku fluho di tráfiko, aksesibilidat di pakusnan, molèster i seguridat di bishitante- i empresarionan