KRALENDIJK - Di 12 te ku 17 di òktober sekretario di estado, Eric van der Burg, lo realisá un bishita di trabou na islanan abou Aruba, Boneiru i Kòrsou.
Señor Van der Burg ta inisiá su bishita di trabou riba djaluna, 12 di òktober, na Aruba ku un oudiensia serka gobernador, Alfonso Boekhoudt i ta hiba kombersashon atministrativo ku entre otro, Promé Minister Mike Eman i minister di entre otro Relashonnan den Reino, Gerlien Croes. Seguidamente e sekretario di estado lo bishitá One of A Kind Café Aruba, un ‘cafe’ di fundashon Trampolin pa Trabou, kaminda personanan ku ta na un distansia for di merkado laboral, ta haña eksperensia laboral. Na Marinierskazerne na Savaneta, e lo risibí informashon tokante trabou di e marinirnan na Aruba i e Programa di Formashon Sosial pa hóbennan. E programa akí su enfoke ta pa amplia oportunidat pa hóbennan pa medio di treinen físiko i siña nan struktura, norma i balor. Despues señor Van der Burg lo bishitá e tereno di eks Refineria Lago, pa tende mas tokante e plannan di restrukturashon pa e añanan benidero. Sekretario di estado Van der Burg lo finalisá e dia na Instituto Korekshonal di Aruba (KIA), pa haña un bista di e aktual kondishon-, reto- i éksitonan den KIA.
Djamars, 13 di òktober, señor Van der Burg ta kuminsá na Aeropuerto Internashonal Reina Beatrix, kaminda e lo inform’é tokante e trabounan na aeropuerto den kuadro di e proyekto ‘fortifikashon di vigilansia di frontera’. Despues e lo sigui ku avion pa Boneiru.
Boneiru
Despues di yegada na Boneiru, e dia lo ta dediká na kombersashonnan atministrativo ku entre otro gezaghèber John Soliano i Kolegio Ehekutivo. E kombersashonnan lo enfoká entre otro riba e situashon polítiko atministrativo i progreso di e palabrashonnan den e akuerdo atministrativo. Ku direktiva di Selibon Lagun e lo papia tokante e situashon aktual i maneho operashonal. Durante esaki lo trata tambe ehekushon di e Akuerdo Atministrativo Aserkamentu di Selibon Lagun. Ademas e lo hiba kombersashon ku Bonaire Hotel and Tourism Association i Tourism Corporation Bonaire, tokante desaroyo di turismo na Boneiru.
Riba djárason mainta, 14 di òktober, sekretario di estado lo ta na Rijksdienst Caribisch Nederland (RCN). Aya lo duna entre otro atenshon na temanan manera dunamentu di servisio, digitalisashon i gobièrnu desisivo. Señor Van der Burg lo bishitá diferente sekshon di RCN i lo hiba kombersashon ku empleadonan di RCN. E sobrá di dia lo ta dediká na un bishita na Duana i Haf. Sekretario di estado Van der Burg ta finalisá su bishita na Boneiru ku un kombersashon na Kámara di Komersio pa papia tokante klima di invershon na Boneiru.
Kòrsou
Despues di yegada na Kòrsou riba djaweps, 15 di òktober, sekretario di estado lo tin un oudiensia serka gobernador Mauritsz de Kort i e lo hiba kombersashon atministrativo ku entre otro Promé Minister Pisas i Konseho di Minister di Kòrsou. Na Kòrsou lo duna e sekretario di estado informashon riba diferente tópiko, inkluyendo fronteranan sigur i desaroyo di bario.
Riba e último dia di e bishita di trabou, djabièrnè, 16 di òktober, sekretario di estado lo papia ku presidente di Korte Komun di Hustisia i e sekretario di Kolegio supervishon finansiero. Tambe e lo asistí na e dia di nabegashon di marina. Esaki ta un paseo ku barku ku Marina Real i otro unidatnan di forsa armá ta organisá pa invitado-, partner- di kadena i otro interesadonan.