KRALENDIJK — Bo tiner tin gana di deskubrí algu nobo? For di 24 te ku 30 di sèptèmber, Biblioteka Públiko Boneiru ta organisá LINK UP!, un siman yen di aktividat grátis pa hóbennan di 12 te ku 18 aña. E tema ta bisa tur kos: Topa, krea, i pertenesé. Hunga wega, realidat virtual, un anochi di pelíkula i un seshon interaktivo tokante medionan sosial tin algu pa kada hóben deskubrí.
Na LINK UP! hóbennan por purba kos nobo, deskubrí nan talentonan i konosé otro hóben den un ambiente relahá. Si bo no konosé niun hende, no ta problema: tur hóben ta bon biní i tur hóben tambe ta konta.
Kiko tin riba programa?
Anochi di wega — 24 di sèptèmber | 18:00 – 20:00
Un anochi yená ku weganan di mesa, un wega di skapa emoshonante i kompetensia di weganan riba PlayStation.
Festival di Makerspace — 25 di sèptèmber | 18:00 – 21:00
Deskubrí i krea: Disko silensioso, pintura fluoresente, eksperensia ku realidat virtual, Nintendo Switch, studio di podcast i un reto ku pèn 3D.
Wak pelíkula i relahá — 26 di sèptèmber | 18:00 – 22:00
Un anochi hiláriko di pelíkula, ku ta inkluí snèknan di bèrdat pa sine: pizza, hotdog i popcorn.
Ki bo sa dje ko’i? – Bo kontenido. Bo eskoho. — 30 di sèptèmber | 15:00 – 16:30
Un seshon interaktivo tokante IA, algoritmonan, intimidashon sibernétiko i medianan sosial, den kolaborashon ku Akseso. Kon abo ta determiná kiko bo ta mira i kiko esei ta hasi ku bo?
Tur aktividat ta tuma lugá na Biblioteka Públiko Boneiru.
Dikon LINK UP!?
Biblioteka ta un lugá kaminda bo por ta bo mes i kaminda bo por deskubrí tur loke bo por hasi. LINK UP! ta trese tur esaki huntu den un siman so: hóbennan ta haña eksperensia nobo, desaroyá nan interesnan i konosé otro hóbennan di nan edat den un ambiente sigur i hospitalario. Asta hóben ku ta un tiki reservá òf ku ainda no konosé niun hende por integrá fásil. E tim di biblioteka ta organisá i guia tur e aktividatnan.
Registrá ta fásil
Tur aktividat ta grátis i bo no mester ta miembro di biblioteka. Registrashon si ta obligatorio. Bo ta yena e formulario un biaha so; despues bo ta skohe na kua aktividat bo tiner lo partisipá un òf vários aktividat.
Registrá bo tiner aki pa LINK UP!
Bo por registrá bo tiner bo mes, òf parti e lenk kuné pa e mes skohe na kua aktividat e kier partisipá.
Tene na kuenta: e kantidat di lugá pa kada aktividat ta limitá, pues registrá na tempu.
Bon pa sa
-
Tur aktividat ta grátis; registrashon ta obligatorio.
-
Pa hóbennan di 12 te ku 18 aña.
-
Lugá: Biblioteka Públiko Boneiru.
-
Miembresia no ta nesesario i te ku 18 aña miembresia ta grátis.
-
Mayor/tutor ta responsabel pa trese i buska nan tiner.
Duna bo tiner e oportunidat pa deskubrí, krea i sera amistat nobo.