WILLEMSTAD – Un grupo di 23 aspirante a finalisá e periodo di introdukshon di kuater siman di Estudio Básiko di Polis i Wardakosta (BOPK) i awor ta kuminsá ku nan estudio di dos aña.
E grupo ta konsistí di 13 aspirante di Wardakosta, sinku di Kuerpo Polisial Hulanda Karibense (KPCN) i sinku di Kuerpo Polisial Sint Maarten (KPSM).
Durante e periodo di introdukshon ‘Huntu Mas Fuerte’, atenshon tabata riba resistensia físiko i mental, disiplina, desaroyo personal i traha den tim. E periodo a finalisá ku un treinen final, siguí pa un yegada konhunto na Base di Marina Parera na Kòrsou.
Durante e próksimo dos aña, e aspirantenan lo risibí formashon den entre otro konosementu profeshonal, abilidatnan operashonal, integridat i kolaborashon. E estudio ta prepará nan pa futuro trabou na Wardakosta, KPCN òf KPSM.