KRALENDIJK – Durante e di 59 edishon di Regatta Bonaire, ku ta kuminsá djadumingu 11 di òktober, diferente instansia lo hasi kòntròlnan riba awa pa vigilá seguridat i kumplimentu ku lei i regulashon.
Tim Multidisiplinario Marítimo Hub Boneiru (MMHB) lo ta aktivo durante e evento, ku partisipashon di Duana Hulanda Karibense, Koninklijke Marechaussee (KMar), Wardakosta di Karibe Hulandes, Kuerpo Polisial Hulanda Karibense (KPCN) i Entidat Públiko Boneiru (EPB). E kòntròlnan lo tuma lugá entre Kòrsou i Boneiru, rondó di Boneiru i den bahia di Kralendijk.
Duana lo pone atenshon prinsipalmente riba tráfiko di merkansia, proseduranan di importashon i eksportashon i merkansia prohibí. KMar lo kontrolá kondishonnan di entrada di personanan i vigilá frontera.
Wardakosta lo kontrolá entre otro dokumentonan di barku, manera karchi di registrashon i pèrmit pa nabegá, i si e kantidat di persona na bordo ta kuadra ku e dokumentonan di e boto. Wardakosta tambe lo kontribuí na mantenementu di órden públiko i seguridat.
Durante Regatta lo tin refuerso èkstra disponibel pa asistensia den kaso di emergensia. Por yama Wardakosta na 913 òf manda WhatsApp na 5100913.