NEW YORK – Riba e kuentanan di media sosial di e anterior presidente Venezolano Nicolás Maduro a aparesé pa promé biaha pòtrètnan kaminda por mir’é for di dia ku Estadonan Uní di Amérika a tum’é prezo. For di yanüari Maduro ta detené na New York. Huntu ku e pòtrètnan tin un mensahe kaminda e ta bisa ku e i su esposa Cilia Flores “ta resistí”.
Riba e dos imáhennan Maduro tin paña deportivo shinishi bistí i e ta hasi ku ámbos man un senal di viktoria. Ta mira klaramente ku el a pèrdè peso for di dia di su detenshon. Segun e datonan ku ta pèrtenesé na e pòtrètnan, nan ta saká dia 25 di yüni. Djadumingu numa a publiká nan.
AFP no por a determiná independientemente si e pòtrètnan ta outéntiko. Agensia di prensa a pidi e prizòn pa konfirmashon, pero no a haña kontesta mésora.
Huntu ku e imáhennan tin un mensahe personal ku ta atribuí na Maduro. Eiden e ta bisa ku e ta manda e pòtrètnan komo regalo pa su ñetunan i pa hendenan ku ta sostené. E ta bisa ku e i su señora ta keda “fuerte, kalmo i ku hopi konfiansa” i ta konkluí ku e mensahe ku Venezuela lo lanta bèk.
No tin internèt
Remarkabel ta ku Maduro mes no tin akseso na korant òf internet. Un fuente yegá di e anterior presidente ta bisa e agensia di prensa ku e por tin kontakto telefóniko si ku su famia i abogadonan.
P’esei e ta haña alrededor di 300 minüt pa luna. Un yamada telefóniko individual por dura maksimalmente djessinku minüt. P’esei no ta kla ken a pone e potrètnan i e mensahenan korespondiente na nòmber di Maduro riba su medianan sosial.
Su yu hòmber Nicolás Maduro Guerra a bisa anteriormente ku su tata mirando e sirkumstansianan ta bon i ta dediká hopi tempu na studia Beibel.
Detené dede yanüari
A detené Maduro i su señora Cilia Flores na luna di yanüari na Caracas durante un operahon militar Merikano i seguidamente a hiba nan Estados Uní di Amérika. Nan ta detené na Brooklyn, New York.
Hustisia Merikano ta akusá ámbos di entre otro partisipashon den tráfiko di droga i delitonan ku arma di kandela. Maduro i Flores ta nenga e akusashonnan. Nan proseso penal ta planiá pa 1 di yüni 2027 segun un korte federal na New York.
E imáhennan a aparesé dos dia despues ku presidente interino Delcy Rodríguez a anunsiá un akuerdo petrolero ámplio ku Estadonan Uní di Amérika. E akuerdo ta hasi posibel ku partidonan Merikano ta bai eksplotá kamponan di petroli. Rodrígues ta bisa ku e ta skohe pa koperashon ku Washington pasobra e ke hasi Venezuela un produktor di petroli importante atobe.