KRALENDIJK – E fayo ku tabata kausando problema pa klientenan di Pagabon desde djarason pa kompra di krédito pa koriente a resultá ku ta originá for di e sistema di un provedó eksterno di WEB. Segun e kompania di awa i koriente, aki no a logra kumpli ku su obligashonnan kontraktuwal na tempo, ku ta e motibo ku e solusho a tuma mas tempu. Aktualmente e sistema di Pagabon ta funkshonando normalmente.
Durante e fayo, e sistema no por a generá tokennan di Pagabon. Pasobra e solushon tékniko tabata dependé di e provedó eksterno, WEB mes no por a solushoná e problema.
Pa evitá ku klientenan lo a keda sin koriente, WEB a pone temporalmente un number di WhatsApp disponibel i a amplía e servisio di avería ku téknikonan adishonal. Empleadonan a bishitá klientenan na nan kas pa ofresé un solushon temporal kaminda esaki tabata nesesario.
Awor ku e sistema ta funkshonando atrobe, klientenan ku a risibí un solushon temporal lo wòrdu bishitá pa normalisá nan konekshonan.
WEB a bisa ku lo evalúa e fayo huntu ku e provedó i ku lo tuma medidanan adishonal pa limitá e chèns i konsekuensianan di un fayo similar den futuro.