WILLEMSTAD – Entrante 1 di ougùstùs habitantenan di Kòrsou por entregá bòter di plèstik, bleki di aluminio i glas pa sèn. Kunukuman ta kuminsá e dia ei ku un prueba di seis luna. E stashon pa kolektá ta para tres dia pa siman na diferente lugá riba e isla.
E promé kolekshon ta tuma lugá djasabra 1 di ougùstùs riba lugá di parker outo banda di restorant Bali na Seru Grandi . Djamars e stashon ta na lugá di parker na Waaigat na Punda i djaweps na Kaminda di Nanzi na Montaña. Riba tur tres dia habitantenan por akudí entre 10’or di mainta i 3’or di mèrdia.
Diferente di loke a pensa inisialmente lo no habri pa awor tres punto di entrega pareu. Ta trata di un stashon ku ta ruler entre e tres sitionan. Finalmente Kunukuman ke pa por kolektá na tur sitio pareu i despues posibilidat pa ámplia.
“Nos mester dal e promé paso”, e ta bisa. “Despues nos por sigui operá.” Segun Kunukuman e poblashon ta reakshoná riba e inisiativa i sierto habitante a kuminsá warda kaba bòter- i blekinan.
Ta paga pa kilo
Pa bòternan di plèstik ta paga un florin pa kilo. Blekinan di aluminio ta produsí 1 florin i 25 sèn pa kilo.
Mester kita dòpi for di bòternan di plèstik. Por trese eseinan si apart den un saku pa pisa nan tambe. Tambe por plat e bòternan pa asina nan tuma ménos lugá.
Serka aluminio ta trata solamente di blekinan di bibida. No ta tuma bleki di bèrdura i empake di kuminda di pushi i kachó, pasobra nan ta di heru. Pa glas por entregá entre otro bòternan di serbes, di biña i otronan. Mester kita tapanan di metal delantá.
Ta separá i pisa e matrial kolektá na e sitio mes. Despues esun ku ta tresé ta tende kuantu e ta produsí. Ta hasi e pago mesora riba e kuenta via e app Sentoo, e variante Kurasoleño di Tikkie. Kunukuman ta konsehá pa instalá e app delantá, di moda ku no ta surgi retraso innesesario na e punto di kolekshon.
Spar na kas promé
Segun Kunukuman lo produsí tiki si bo ta bini ku solamente algun bòter òf bleki so. Un bòter di plèstik no ta pisa muchu i p’esei mester di desenas di bòter pa yega un kilo. P’esei e inisiativa ta dirigí ku hendenan ta spar e material na kas òf kolektá huntu ku famia i bisiña.
“Bo por hasié huntu ku bo bisiñanan. Bo por bai limpia ku bo yunan tambe,” Kunukuman ta bisa. Ta mihó ku esun ku tin algun bleki so, warda te ora ku el a kolektá mas.
Muchanan ta hunga un ròl importante den e plan. Dunando e sushi un balor di sèn, Kunukuman ta spera ku nan ta anda mas konsiente ku loke ta tira afó riba kaya òf den naturalesa. Bòter- i blekinan ku nan kolektá ta produsí ademas un montante chikitu na sèn pa tene den saku.
“Si muchanan sa ku plastic, bleki i glas bal sèn, nan ta rekonosé esei,” e ta bisa. “Si un hende tira un bòter for di outo un muchu asina por bisa: Bo ta tira mi sèn di tene den saku afó.”
E loke ku produsí ta bai pa karidat
Si habitantenan ke nan por indiká ku e montante ta bai pa karidat. E promé tres lunanan ta regalá Rescue Paws Curaçao na Fontein, ku ta akohé kachó, e sèn. Despues ta skohe kada tres luna un otro instansha i e intenshon ta ku esun ku a kaba di risibí e kontribushon ta proponé un susesor. Asina mester surgi un kadena di organisashon ku ta pobechá di e sushi ku a kolektá.
E prueba ta dura seis luna i Kunukuman ta spera ku por sigui ku e akshon, lokual ta dependé di e interes i e kantidat di material ku ta rekolektá. E meta final no ta pa solamente kolektá sushi, pero spesialmente pa evitá ku bòternan di plèstik, bleki i glas ta keda drumí kant’i kaminda.