DEN HAAG – Riba 2 di òktober ta opsekiá Rei Willem-Alexander e resultadonan di un investigashon grandi independiente di e ròl di Kas Oranje Nassau den historia kolonial di Hulanda. E investigashon ta kubri e periodo di 1600 te 2025 i a duna komo resultado sinku buki.
Investigadó prinsipal Gert Oostindie ta entregá e publikashonnan durante un enkuentro den e Edifisio di Akademia di Universidat di Leiden. Mas o ménos sesenta inverstigadó a traha e último añanan na e proyekto.
Un di e sinku bukinan ta trata spesífikamente poder kolonial, probecho i prestigio. Tambe ta publiká un investigashon biográfiko di Oranjes for di Willem de Zwijger te Willem-Alexander i un buki internashonal komparativo tokante kasnan real Europeo i kolonialismo.
Oostindie a skirbi tambe e buki públiko Oranje en de Koloniën, 1600-2025. Historia kolonial di Kas Oranje-Nassau. Na mes momento ta aparesé un vershon na idioma Ingles di esei.
Relevante pa islanan Karibense
E investigashon ta relevante pa Kòrsou i e otro islanan Karibense tambe. E investigadónan a wak e historia kolonial di Kas Oranje-Nassau den sentido ámplio. Na momento di e presentashon numa ta bira konosí kua konklushon nan ta dedusí spesífikamente di kolonianan Hulanda Karibense, sklabitut, poder kolonial i posibel probecho finansiero di Oranjes.
Na 2022 Rei mes a tuma e inisiativa pa e investigashon. Segun Servisio Nashonal di Informashon Kas Real no tabatin partisipashon konkreto ku e intenshon, ehekushon òf konklushon.
E investigadónan a haña akseso si na fuentenan relevante di archivonan partikular di Kas Real, ku Kolekshonnan Real ta atministrá.
Despues di e presentashon di e resultadonan di e investigashon riba 2 di òktober rei Willem-Alexander mes ta reakshoná riba e resultadonan. NOS ta transmití e enkuentro bibu via NPO 1.