KRALENDIJK – Mas ku un aña despues di e tiroteo fatal na Club Rush a atendé kontenido di e kaso penal Galápagos ámpliamente. Diferente grupo di hóben a aparesé dilante tribunal pa nan ròl den e violensia ekstremo ku arma di kandela e anochi ei kaminda Clayshenou D. di 15 aña a pèrdè su bida. A pidi kastigu di prizòn di hopi aña kontra e sospechosonan prinsipal.
E kaso ekstenso no ta trata solamente e tiroteo pafó di Club Rush. Mas o ménos mei ora despues a sigui di nobo un violensia ku arma di kandela den Nort’i Saliña. Ministerio Públiko (MP) ta konsiderá ku un gran parti di e akontesimentunan e madrugá ei ta ligá ku otro.
Segun informashon di MP a detené na tur kasi djesocho sospechoso pa e investigashon. Segun Daan Smits ku ta embolbí komo fiskal, pa e kantidat di sospechoso, probablemente pa KPCN Galápagos ta un di e investigashonnan penal mas grandi, si no ta esun di mas grandi ku e kuerpo a yega di ehersé na Boneiru. Asina a analisá entre otro 600GB na material visual. Durante e dianan di seshon a mustra un kompilashon di e imáhennan di kámara mas importante.
Tres grupo
Durante tratamentu di kontenido MP a repartí e sospechosonan mas o ménos den tres grupo a base di e dosié: Nort’i Saliña, Den Tera (Antriol) i Tera Korá. A trata e kasonan di e gruponan aki riba diferente dia di seshon.
E sospecho mas pisá ta serka dos hóben di Nort’i Saliña. MP ta sospechá ku huntu nan ta responsabel pa tira Clayshenou D. mata.
Un di nan tabatin 15 aña na momento di e tiroteo. Kontra e otro sospechoso, Gedion O., a pidi un kastigu di prizòn di 24 aña. Ámbos ta sintando mientrastantu mas ku un aña den aresto preventivo.
Segun su rasonamento hurídiko MP no mester prueba nesesariamente for di kua arma e bala mortal a sali. Ora por prueba ku dos sospechoso a aktua konsientemente i den estrecho koperashon huntu ora di tira e víktima, por tene ámbos responsabel pa komplisidat di homisidio segun MP.
Testigu krusial anónimo
Un testigu anónimo menasá, ku ta denominá den e dosié penal komo testigu X, ta desempeñá un ròl importante den evidensia.
A protehá identidat di e persona aki asina fuerte ku ni fiskal ku ta trata e kaso, ni e tim investigadó di KPCN, ni abogadonan i wes no sa ken e ta. E testigu ta deklará ku e tabata presente i ku el a mira ku ámbos sospechoso prinsipal a tira den direkshon di Clayshenou D.
Segun e testigu e víktima di 15 aña a bai suela despues di un tiru di e menor. MP ta enfatisá na mes momento ku e deklarashon aki no por sirbi komo úniko prueba i ku mester evalu’é den kombinashon ku otro evidensia.
Defensa ta pone e konstrukshon di prueba na duda
Durante su defensa oral abogado Selvin Larmonie a indiká ku segun Extra Bonaire MP no por a prueba ku su kliente Gedion O. a lòs e tiru mortal.
E sospecho prinsipal menor di edat tambe ta nenga di ta responsabel pa morto di Clayshenou D.
Extra Bonaire a nota su último palabranan. E sospechoso ku mientras tantu tin 16 aña a keda persistí dilanti wes ku e no a mata Clayshenou i ke rekobrá su libertat bèk.
Su abogado Marga van Lieshout tin banda di esei preguntanan fuerte riba un rapòrt di Konseho di tutela di e menor di edat. Durante e tratamentu Extra Bonaire a dediká atenshon èkstra na e tratamentu.
Medida PIJ úniko
MP a eksihí un aña di detenshon hubenil i un medida PIJ kontra e menor di edat. Medida PIJ ta un detenshon hubenil ku guia intensivo. E detenshon hubenil pa un aña ta e kastigu máksimo pa motibu di su edat durante e krímen ku por imponé riba dje dentro di derecho penal hubenil. No por imponé kastigu di prizòn na un hóben.
Por kompará un medida PIJ ku un medida di seguridat hubenil i ta dirigí riba un tratamentu intensivo i duradero durante dos aña ku e posibilidat ku wes por alargá e medida. Boneiru sinembargo no ta disponé di un instituto kaminda por ehekutá tal medida. JICN lo ta tratando pa hasi den futuro e tratamentu posibel na Boneiru tras di porta será. P’esei MP ke laga e tratamentu tuma lugá na Hulanda Europeo na momento ku wes imponé e medida. Si wes disidí di tuma e eksigensia i manda e sospechoso Hulanda, esaki lo ta pa promé biaha den historia.
Akshon di vengansa den Nort’i Saliña
E kaso no a para na e violensia dilanti di Club Rush. Segun MP e otro grupo di Den tera, enkabesá pa ruman di e víktima ku a fayesé, a kuminsá yama nan ku nan djis despues di e tiroteo. A palabrá unda lo bini huntu i lo a regla armanan di kandela i munishon.
Seguidamente tres sospechoso a kore bai Nort’i Saliña den un Toyota blanku. Einan nan lo a buska e otro grupo i los tiru atrobe. A tira bèk riba e outo tambe.
MP ta persiguí e tres okupantenan entre otro pa intento di asesinato. A eksigí kastigu di prizòn di djeskuater, djesseis i djesocho aña kontra nan.
Kastigunan mas abou tambe
No ta akusá kada sospechoso di komplisidat den morto di Clayshenou D. òf e akshon di vengansa despues. A persiguí otro sospechosonan entre otro pasobra nan a tira ku arma di kandela na otro sitio.
Pa dos di e sospechosonan e eksigensianan ta konsiderablemente mas abou, esta tres aña i trinta luna di kastigu di prizòn. Segun MP nan partisipashon ta mas chikitu, pero nan tambe a kontribuí na eskalashon di e anochi ei usando armanan di kandela.
Marion S., padrasa di e sospechoso di Nort’i Saliña, tambe a aparesé dilanti di wes. Extra Bonaire ta informá ku MP a eksigí seis aña di prizòn kontra dje. Defensa a pidi apsolushon pa tira riba e víktima.
Hopi pregunta pa wes
Despues di investigashon di mas o ménos un aña ainda no a klarifiká kada detaye di e anochi ei. Hopi sospechoso a keda ketu i testigunan tampoko tabata dispuesto tur ora pa deklará, segun MP.
Wes mester disidí awor entre otro kuantu balor por duna e deklarashon di e testigu anónimo, si por papia di komplisidat i pa kua sospechoso mester apliká derecho penal pa adulto òf netamenta derecho penal hubenil.
E sentensia ta sigui na luna di òktober.