KRALENDIJK – Entidat Públiko Boneiru a develá e plachi di nòmber ofisial di Plasa Machi Mimi. Diputado Dennis Martinus a develá e plachi den presensia di famia di Machi Mimi i e direktor interino di Planifikashon i Desaroyo.
Plasa Machi Mimi ta un sitio históriko konosí den sentro di Playa. E plasa ta karga nòmber di Bernabé Dominga Evertsz, mihó konosí komo Machi Mimi. Durante hopi aña e tabata un bendedó di piská ku tur hende konosé na e sitio akí. Piskadónan tabata trese loke nan a kue i habitantenan tabata bini huntu einan. Despues nan tabata bende bèrdura i fruta tambe na e plasa akí. Di e manera akí e plasa a bira un lugá konosí pa diferente generashon di boneriano.
Pòtret: EPB
Durante tur e añanan famia di Machi Mimi a tene su nòmber i su historia bibu i anteriormente nan mes a pone un plachi na e plasa. Ku e plachi di nòmber ofisial nobo, for di Entidat Públiko Boneiru tambe Plasa Machi Mimi ta haña un lugá fiho i visibel.
Durante e develo diputado Martinus a para ketu na importansia di konservashon di historia di Boneiru. “Un pueblo ku konosé su historia, sa ta di unda e ta bini. E plachi akí ta yuda nos pa keda konta e storia tras di Machi Mimi nòmber i e ta duna rekonosimentu na e hendenan ku a kontribuí na Boneiru.”
Pòtret: EPB
Ñetu di Machi Mimi, Max Erwin Juan di Grijze, tambe a kompartí rekuerdo di su wela i di su hubentut rònt di e plasa. El a konta entre otro ku ta tras di e plasa el a siña landa.
Ku e plachi di nòmber ofisial, Entidat Públiko Boneiru ta sòru pa un parti di Boneiru su historia keda bibu.