WILLEMSTAD – Kòrsou a haña na 2025 pa motibu di migrashon na final di kuenta mas ku 2.400 habitante aserka. A establesé nan mes riba e isla un total di 5.900 persona, mientras ku kasi 3.500 persona a bandoná e isla. Esei ta sali na kla for di sifranan nobo di Ofisina Sentral di Estadístika (CBS)
E saldo positivo di migrashon ta konsekuensia di dos desaroyo: e kantidat di inmigrante a oumentá pa e di sinku aña konsekutivo, mientras ku e kantidat di emigrante a baha pa di tres aña konsekutivo.
Na aña 2025 e sifra di migrashon tabata 15,3 pa mil habitante. Esei ta e nivel mas haltu den e seri di CBS ku ta bai bèk te 2011. Un aña promé e sifra di migrashon tabata ainda 4,8 pa mil habitante
Kiko e sifra di migrashon ta?
E sifra di migrashon ta mustra kuantu hende ta bini aserka òf ta bandoná e isla pa mil habitante mediante migrashon. Ta kalkulá esei redusiendo e kantidat di inmigrante ku e kantidat di emigrante i kompará e resultado ku e poblashon.
Un sifra positivo ta nifiká ku mas hende ta bin establesé nan mes ku bai for di e isla. Un sifra negativo ta mustra ku netamente mas hende ta bai. Na 2025 Kòrsou tabatin un sifra di migrashon di 15,3: pa mil habitante a bini pues alrededor di djessinku persona aserka via migrashon.
Kambio despues di añanan di baimentu
E sifranan ta mustra un kambio opvio. Entre 2017 i 2023 kada aña mas hende tabata bandoná e isla enbes di establesé nan mes riba e isla. A alkansá e punto mas abou na 2019 ora 3.500 persona a yega i kasi 6.200 persona a bai. E saldo di migrashon negativo tabata e aña ei alrededor di 2.600 persona.
Durante e añanan di corona tambe e saldo a keda negativo. Na 2021 a yega na final di kuenta 3.300 persona Kòrsou, kontra 5.600 ku a bai. Despues e diferensia a disminuí rápido. Na 2023 a sobra un saldo negativo di 490 persona.
Na 2024 e saldo di migrashon a bira positivo atrobe pa promé biaha for di 2016. E aña ei mas ku 5.000 persona a establesé nan mes na Kòrsou i na final di kuenta 4.300 persona a bandoná e isla, un diferensia di kasi 750 persona. Na 2025 e kambio ei a bira signifikantemente mas fuerte.
Kasi mitar ta bini di Hulanda
Di e personanan ku a establesé nan mes na Kòrsou, kasi mitar ta bini di Hulanda. Venezuela tabata ku kasi djesocho porshento na di dos lugá.
E porsentahenan aki ta bisa algu di e pais di unda e personanan a muda pa Kòrsou, no nesesariamente di nan nashonalidat. Bou di e migrantenan di Hulanda por tin tambe yunan di Kòrsou ku ta bolbe bèk.
Hulanda tabata tambe ku distansia e destinashon mas importante pa personanan ku a bandoná Kòrsou. Di tur emigrante kasi 82 porshento a bai Hulanda. Boneiru a sigui ku algu mas ku seis porshento i Sint-Maarten ku 2,5 porshento.
CBS ta mustra ku migrashon por tin influensia grandi riba desaroyo demográfiko di Kòrsou. E saldo di migrashon positivo sinembargo no ta nifiká outomátikamente ku e poblashon total a krese ku mas ku 2.400 persona. Pa esei mester konta e kantidatnan di nasementu i fayesimentu tambe huntu.