KRALENDIJK – Selibon ta spera di risibí un total di kuater trùk di sushi nobo na fin di òktober 2026. E vehíkulonan a keda pidí kaba i ta destiná pa mehorá kapasidat i konfiabilidat di rekoho di sushi na Boneiru.
E kompra ta sigui riba e dos trùknan ku a wòrdu adkerí na febrüari pa atendé problemanan di kapasidat. Tambe a invertí den piesa di reserva, mantenshon i otro ekipo komo parti di e medidanan di emergensia pa stabilisá e situashon na Selibon i lèntfel Lagun.
Aparte di e trùknan, ta amplia e ekipo pisá ku un wheel loader, un dòmtrùk, un kompaktadó pa lèntfel i un katapila. E wheel loader ta entregá kaba; e otro mashinnan ta sperá den òktober. Entidat Públiko Boneiru tambe a pone fondo disponibel pa mehorashonnan den e tayer, e manera di traha na lèntfel i e situashon finansiero i operashonal di Selibon.
Segun EPB, e medidanan a reducí e molèster pa e bisindario, entre otro holó stinki, plaga i riesgo di kandela. Diputado Dennis Martinus ta indiká ku gobièrnu i Selibon ta sigui traha pa garantisá un servisio di rekohementu adekuá i konfiabel.
Sentro nobo di transbordo i separashon
Entretantu, un investigashon ta andando pa determiná e mihó sitio pa un sentro nobo di transbordo i separashon di sushi. Ku gran parti di e medidanan di emergensia finalisá, e enfoke ta pasa gradualmente pa solushonnan di largo plaso.